चंद्रपूर : शेतकऱ्याने शेतीसाठी पीक कर्ज घेतले होते. कर्जाची परतफेड करू न शकल्याने बँकेचे काही अधिकारी वसुली करण्यासाठी आले होते. यावेळी त्यांनी बैलजोडीची जप्ती करतो, अशी धमकी देत बँकेच्या कर्मचाऱ्याने शेतकऱ्याकडून दोनशे रुपयांची लाच घेतल्याचा प्रकार समोर आला. या प्रकाराचा व्हीडिओ सध्या समाजमाध्यमात चांगलाच व्हायरल होत आहे. 

शेतकरी बँकांकडून पीक कर्ज घेत असतो. मात्र निसर्गाच्या लहरीपणामुळे तसेच चांगला भाव मिळत नसल्याने शेतकऱ्याला असलेले अपेक्षित उत्पन्न मिळत नाही. यामुळे बँकेकडून घेतलेल्या कर्जाची परतफेड करू शकत नाही. यामुळे थकबाकीदार असलेल्या शेतकऱ्यांकडून कर्ज वसुली करण्यात येत आहे. अशाच प्रकारे चंद्रपूर जिल्ह्यात काही अधिकारी शेतकऱ्याकडे वसुलीसाठी आले होते. मात्र शेतकऱ्याकडून लाच घेऊन गेल्याचा प्रकार समोर आला आहे. 

बैलजोडी जप्तीची धमकी 

चंद्रपूर जिल्ह्यातील ब्रम्हपुरी तालुक्यातील ही घटना आहे. कर्जदार शेतकरी एका टेम्पोमधून बैलजोडी नेताना बँकेच्या वसुली पथकाची गाडी समोर उभी केली. त्यातून दोन कर्मचारी टेम्पोत बसलेल्या शेतकऱ्याला बैलजोडी जप्तीची धमकी देऊ लागले. वसुली पथकाच्या वाहनावर ब्रम्हपुरी अर्बन बँकेचा फलक लावल्याचे व्हिडिओमध्ये दिसत आहे. 

दोनशे रुपयांची नोट देताच माघारी परतले 

शेतकरी दरवर्षी शेतीसाठी खासगी बँकांकडून कर्ज काढतात. शेतीचा हंगाम सुरू होण्यापूर्वी कर्जाची परतफेडही केली जाते. शेतकरी आता पुढील हंगामाच्या तयारी लागला आहे. असाच एक वयोवृद्ध शेतकरी टेम्पोमध्ये बैलजोडी घेऊन जात असताना अर्बन बँकेच्या वसुली पथकाने त्याला अडवले. शेवटी तडजोड करीत शेतकऱ्याने २०० रुपयांची नोट त्या कर्मचाऱ्याच्या हातात दिल्यानंतर तो माघारी गेला. कर्ज वसुलीच्या नावावर बँकेचे कर्मचारी शेतकऱ्यांशी कसे वागतात, याचा हा नमुना आहे.