चंद्रपूर : जलजीवन मिशन अंतर्गत २३ गावांमध्ये काम पूर्ण करण्यात आले होते. या झालेल्या कामांचे बिल मंजूर करण्यासाठी कंत्राटदाराकडून चार लाख रुपयांची मागणी केली. लाच स्वीकारताना जिल्हा परिषदेच्या ग्रामीण पाणी पुरवठा विभागाच्या कार्यकारी अभियंत्यासह दोन जणांना चंद्रपूर लाचलुचपत विभागाच्या पथकाने रंगेहाथ पकडले आहे. या घटनेने चंद्रपूर जिल्हात परिषदेत खळबळ उडाली आहे. 

चंद्रपूर जिल्हा परिषदेच्या ग्रामीण पाणी पुरवठा विभागाचा कार्यकारी अभियंता हर्ष बोहरे आणि त्याच्या दोन साथीदारांना चार लाखांच्या लाच प्रकरणी रंगेहात अटक करण्यात आली. दरम्यान राज्य शासनाची जल जीवन मिशन ही योजना जिल्हा परिषदेमार्फत राबविण्यात येत आहे. या अंतर्गत चंद्रपूर जिल्ह्यातील राजुरा आणि जिवती या दोन तालुक्यात २३ गावांमध्ये कामे करण्यात आली. या कामाचे कंत्राट एकाच कंत्राटदाराला देण्यात आलेला होता. 

कंत्राटदाराकडून एसीबीकडे तक्रार 

जिल्ह्यातील राजुरा आणि जिवती या दोन तालुकयातील २३ गावांमध्ये पूर्ण झालेल्या जलजीवनच्या कामांचे बिल काढण्यासाठी अभियंता हर्ष बोहरे याने कंत्राटदाराकडे चार लाखांची मागणी केली. तसेच त्याचा वरिष्ठ सहायक सुशील गुंडावार याने वीस हजार रुपये मागितले. इतक्या मोठ्या प्रमाणात रक्कम देणे कंत्राटदाराला मान्य नसल्याने सदर प्रकाराची तक्रार संबंधित कंत्राटदाराने चंद्रपूर एसीबीकडे केली. त्यानुसार सापळा रचण्यात आला. 

रंगेहाथ घेतले ताब्यात 

ठरल्याप्रमाणे चार लाख वीस हजार रुपयांची ही रक्कम सुशील गुंडावार याने स्वीकारली. त्यातील चार लाख रुपये मतीन शेख नामक व्यक्तीच्या हाताने कार्यकारी अभियंता बोहरे याच्या घरी पाठविण्यात आली होती. याचवेळी एसीबीच्या पथकाने त्याला रंगेहाथ पकडले. याप्रकरणी अभियंता बोहरे, वरिष्ठ सहायक गुंडावार आणि पैसे घरी पोचवणारा मतीन शेख या तिघांनाही अटक करण्यात आली.