चंद्रपूर : जळगावातील जामरनेरनंतर विदर्भातील चंद्रपूरमध्ये देखील एक भीषण अपघात झालाय. यात दोघांचा जागीच मृत्यू झालाय. गावापासून ७० किमी अंतरावर दोघांचा दुचाकीची समोरासमोर धडक झाली. यात दोघेही गंभीररित्या जखमी झालेत. उपचारासाठी दोघांना रुग्णालयात हलविण्यात आलं. उपचारादरम्यान दोघांचाही दुदैवी मृत्यू झाला. या घटनेनं गावात शोककळा पसरली आहे. रमेश शामराव दडमल (वय ३६) आणि राकेश रामप्रसाद बदन (वय ३०) अशी मृतकांची नावं आहेत.

मिळालेल्या माहितीनुसार, चंद्रपूर जिल्हातील नागभीड तालुक्यात असणाऱ्या किरमिटी येथील रमेश दडमल आपल्या बहिणीला घेण्यासाठी मुलासह सावली तालुक्यातील हरांबा येथे गेला होता. शुक्रवारी बहिणीला घेऊन परत निघाला. मृतक राकेश बदन हा सुधीर दडमल या मित्रासोबत मूल येथे कार्यक्रमाला जात होता. दोघांच्याही दुचाकीची सिंदेवाही तालुक्यातील सरडपारजवळ समोरासमोर धडक झाली. या घटनेत दोघेही गंभीर जखमी झालेत. नागरिकांनी दोघांनाही राजुली येथील प्राथमिक आरोग्य केंद्रात दाखल केले. मात्र, उपचारादरम्यान त्यांचा दुर्दैवी मृत्यू झाला. शनिवारी किरमिटी येथे शोकाकुल वातावरणात दोघांच्याही पार्थिवावर अंत्यसंस्कार करण्यात आले.

दरम्यान, जळगावमधील जामनेरमध्ये देखील एक भीषण अपघात झालाय. रामपूर तांडा लहासर येथून विवाह सोहळा आटोपून क्रूझरने घराकडे परतत असताना जामनेर-पहर मार्गावर सोनाळा फाट्याजवळ एक भीषण अपघात झालाय. समोरून भरधाव येणाऱ्या आयशर कंटेनरने जोरदार धडक दिल्याने अपघात होऊन क्रूझर उलटली. या भीषण दुर्घटनेत नवरदेवाचे काका दशरथ रतन चव्हाण हे जागीच ठार झाले. तर अन्य नऊ वऱ्हाडी जखमी झाले आहेत. घटनेची माहिती मिळताच आजूबाजूच्या लोकांसह वहऱ्हाडातीलच अन्य वाहनांमधील नातेवाइकांनी जखमींना पहूर ग्रामीण रुग्णालयात दाखल केलं. पोलिसांनी घटनास्थळी धाव घेऊन कंटेनरसह चालकास ताब्यात घेतलं. या प्रकरणी पहर पोलीस ठाण्यात गुन्हा नोंदविण्याचे काम उशिरापर्यंत सुरू होते.