राज्यात अपघातांची मालिका थांबेना झाली आहे. बुलढाण्यातही भीषण अपघाताची घटना समोर आली आहे. बुलढाण्यात एसटी बस आणि दुचाकीचा मोठा अपघात घडला. महामार्गावर सोमवारी झालेल्या भीषण अपघातात तिघांचा जागीच मृत्यू झाला आहे.

मिळालेल्या माहितीनुसार, बुलढाण्यातील छत्रपती संभाजीनगर महामार्गावर धाड गावाजवळ एसटी बस आणि दुचाकीची समोरासमोर धडक झाली. भरधाव दुचाकी छत्रपती संभाजीनगरहून बुलढाण्याकडे जाणाऱ्या शिवशाही बसला धडकल्याने ही घटना घडली. या भीषण अपघातात दुचाकीवरील तीन तरुणांचा जागीच मृत्यू झाला आहे.

अपघातात मृत पावलेले तरुण हे बुलढाणा तालुक्यातील ढाल सावंगी गावातील होते. कैलास दांडगे, रवी चंदनशिव आणि अंकुश पाडळे असे तिघांची नावे आहेत. तिन्ही तरुण हे विशीतील वयोगटातील होते. या अपघातानंतर महामार्गावरील वाहतूक ठप्प झाली. या अपघातानंतर अपघातस्थळी मोठा जमाव झाला.

अन् अपघातस्थळी पोलीस तातडीने पोहोचले

महामार्गावर झालेल्या अपघाताची माहिती मिळताच पोलिसांनी घटनास्थळी धाव घेतली. त्यानंतर अपघातस्थळी जमा झालेली गर्दी पोलिसांनी पांगवली. त्यानंतर पोलिसांनी तातडीने तरुणांचे मृतदेह ताब्यात रुग्णालयात पाठवले. यावेळी स्थानिक नागरिकांनी देखील पोलिसांना मदत केली. त्यानंतर पोलिसांनी वाहनधारकांची कोंडीतून सुटका केली. पोलिसांनी महामार्गावरील दोन्ही बाजूची वाहतूक कोंडी सुरळीत केली. या अपघातात तिघांच्या मृत्यूने ढाल सावंगी गावात शोककळा पसरली आहे.