बुलढाणा : यंदा पाणी टंचाईचे सावट सर्वदूर पसरले आहे. प्रामुख्याने डोंगराळ भागातील आदिवासी पाड्यांवर याची दाहकता अधिक पाहण्यास मिळत आहे. बुलढाणा जिल्ह्यातील भिंगारा, चाळीसटपरी या आदिवासी पाड्यांवर दरवर्षी हि समस्या पाहण्यास मिळत असून यंदा अधिकच टंचाई आहे. यामुळे हंडाभर पाण्यासाठी दोन किलोमीटरची पायपीट करावी लागत आहे. 

बुलढाणा (Buldhana) जिल्ह्यातील सातपुड्याच्या कुशीत वास्तव्यास असलेल्या भिंगारा, चाळीसटपरी या आदिवासी पाड्यांवर नेहमीचीच पाणी टंचाई आहे. उन्हाळा, पावसाळा आणि हिवाळ्यात देखील इथल्या प्रत्येकाला हंडाभर पाण्यासाठी दोन किलोमिटर अंतरावर पायपीट करत जावे लागते. एवढच काय तर तो हंडा भरण्यासाठी जीव धोक्यात घालावा लागत असल्याचे भीषण चित्र येथे पाहण्यास मिळत आहे. मात्र भाजपचे आमदार संजय कुटे हे सांगतायेत की मतदार संघात कुठेही पाणी टंचाई (Water Scarcity) नाही. मात्र ही टंचाईची भिषण वास्तविकता दिसून आली आहे.

लहानग्यांच्या डोक्यावरही हंडा 

भर उन्हातान्हात पाण्यासाठी दोन किलोमीटर अंतर पायपीट करावी लागते. पाणी घेण्यासाठी जाणाऱ्या महिलांसोबत लहान मुलीदेखील जात असतात. डोक्यावर पाण्याने भरलेला हंडा घेऊन डोंगराळ भागातून वाट काढत जात असतात.