संजय जाधव, प्रतिनिधी...

Buldhana Crime News: बुलढाणा शहरातून एक धक्कादायक घटना समोर आली आहे. बुलढाण्याचे राष्ट्रवादी काँग्रेस पक्षाचे शरद पवार गटाचे शहराध्यक्ष अनिल बावस्कर यांच्यावर प्राणघातक हल्ला करण्याचा प्रयत्न केल्याने खळबळ उडाली आहे. हल्ल्यावेळी अनिल बावस्कर सावध असल्याने मोठा अनर्थ टळला असून एका हल्लेखोरास पकडण्यात यश आले आहे. (Crime News In Marathi)

याबाबत सविस्तर माहिती अशी की, अनिल बावस्कर यांची शहरातील (Buldhana) जयस्तंभ चौकात इडली-डोसाची हातगाडी आहे. रात्री नऊ वाजताच्या सुमारास तोंड बांधून आलेल्या तिघांनी त्यांच्या त्यांच्या डोक्यात लोखंडी रॉड टाकण्याचा प्रयत्न केला. पण बावस्कर सावध असल्यामुळे बचावले. त्यांनी वरच्यावर रॉड पकडून हल्लेखोरास जोरदार लाथ मारली.

तोपर्यंत आजूबाजूचे व्यावसायिक बावस्कर यांच्या मदतीला धावले. या हल्लेखोराला पकडून त्याला चोप देण्यात आला. मात्र त्याचे दोन साथीदार पळून जाण्यात यशस्वी राहिले. सदर हल्लेखोराला पोलिसांच्या हवाली करण्यात आले आहे. हा हल्लेखोर जालना येथील असल्याचे समजते.

या हल्ल्याची माहिती मिळताच शहर पोलीस स्टेशनमध्ये राष्ट्रवादीचे नेते नरेश शेळके, काँग्रेसचे शहराध्यक्ष दत्ता काकस तसेच जाकीर कुरेशी, सत्तार कुरेशी सह अनेक सामाजिक कार्यकर्ते दाखल झाले होते. या प्रकरणात पोलिसांत तक्रार दाखल करण्यात आली आहे. बावस्कर एक प्रामाणिक व्यावसायिक असून सक्रिय पदाधिकारी आहेत. सामाजिक कार्यामध्ये अग्रेसर असलेल्या बावस्करांवर हल्ल्याचा सर्व स्तरातून निषेध होत आहे. (Latest Marathi News)