बुलढाणा जिल्ह्यातील जळगाव जामोद तालुक्यातील राजुरा शिवारात उघडकीस आलेल्या एका थरारक घटनेने संपूर्ण परिसर हादरून गेला आहे. काही दिवसांपूर्वी या परिसरात एका २० ते २५ वयोगटातील एका तरुणीचा अर्धवट जळालेला आणि शीर धडावेगळे केलेला मृतदेह सापडला. याप्रकरणी पोलिसांनी तातडीने तपास केला असता, तपासात धक्कादायक प्रकार समोर आला आहे. प्रेमसंबंधांच्या संशयातून जन्मदात्या बापाने आणि भावाने मिळून तरुणीची हत्या केल्याचे उघडकीस आले आहे.

मिळालेल्या माहितीनुसार, मृत तरुणीचे नाव शिवानी बापुराम कळमेकर असून ती मध्यप्रदेशातील बुऱ्हाणपूर जिल्ह्यातील खडकनार येथील रहिवासी होती. १५ एप्रिल २०२६ रोजी ती लग्नबंधनात अडकली. लग्नानंतरही तिच्या चारित्र्यावर संशय घेत वडील बापुराम कळमेकर यांनी तिच्या हत्येचा कट रचला. शिवानीचे तिच्याच नात्यातील एका तरुणासोबत संबंध असल्याचा संशय त्यांना होता आणि याच संशयातून त्यांनी टोकाचा निर्णय घेतला.

२३ एप्रिलच्या रात्री बापुराम यांनी मुलगी शिवानीच्या डोक्यात बांबूने जोरदार वार केला, ज्यामुळे तिचा जागीच मृत्यू झाला. त्यानंतर पुरावा नष्ट करण्याच्या उद्देशाने त्यांनी मृतदेह एक दिवस घरात लपवून ठेवला. दुसऱ्या दिवशी मुलगा अजयच्या मदतीने मृतदेह मोटारसायकलवरून महाराष्ट्र-मध्यप्रदेश सीमेवरील राजुरा शिवारात नेण्यात आला. तिथे ओळख पटू नये म्हणून तिचे शीर धडावेगळे करण्यात आले आणि मृतदेह जाळण्याचा प्रयत्न करण्यात आला. हत्येसाठी वापरलेले साहित्य आणि रक्ताने माखलेले कपडे जंगलात टाकून देण्यात आले.

दरम्यान, बुलढाणा पोलिसांनी या प्रकरणाचा तपास वेगाने सुरू केला. संशयित कुटुंबाची चौकशी केली असता आरोपींनी अखेर गुन्ह्याची कबुली दिली. पोलिसांनी बापुराम कळमेकर आणि अजय कळमेकर यांना अटक केली असून पुढील तपास सुरू आहे. पित्यानेच स्वतःच्या लेकीची निर्घृण हत्या केल्याची ही घटना समाजाला हादरवून सोडणारी आहे.