पुणे : मराठी साहित्यातील नामवंत लेखक, मराठी विषयाचे प्राध्यापक, कथाकथनकार म्हणून महाराष्ट्राला परिचित असणारे प्रा.द. मा. मिरासदार यांचे आज वयाच्या ९४ व्या वर्षी वृद्धपकाळाने निधन झाले. द. मा. मिरासदार यांचा जन्म 14 एप्रिल 1927 रोजी झाला होता. मिरासदार यांच्या साहित्य सेवेची सुरुवात पत्रकारितेतून झाली, साहित्याच्या याच झऱ्याने पुढे व्यापक रूप धारण केले.

पुण्यामध्ये पत्रकाराच्या भूमिकेत काही वर्षे काम केल्यानंतर ते अध्यापन क्षेत्राकडे वळले. 1961 ते 1987 या काळात त्यांनी औरंगाबाद मधील देवगिरी महाविद्यालय आणि पुण्यातील गरवारे वाणिज्य महाविद्यालयात ज्ञानदानाचे कार्य केले. मराठीचे प्राध्यापक म्हणून त्यांनी अमाप विद्यार्थीप्रेम मिळवले.

त्यांच्या साहित्याने सामान्य वाचकांबरोबर जाणकार समीक्षकांचीही दाद मिळावली आहे. साहित्याच्या क्षेत्राप्रमाणे मराठी चित्रपटसृष्टीतही त्यांच्या लेखणीचा संचार लक्षणीय ठरला. कथासंग्रहाप्रमाणे त्यांच्या पटकथा संवादांना ही शासकीय पारितोषिकांचा मान मिळाला आहे. कथाकथन हा महाराष्ट्रात लोकप्रिय झालेला नवा कलाप्रकार लोकप्रिय करण्यात मिरासदारांचा सिंहाचा वाटा आहे.

अश्या शब्दात ज्येष्ठ नेते शरद पवार यांनी मिरासदार यांच्या निधनावर शोक व्यक्त केला आहे.

Edited By : Krushnarav Sathe