अभिजीत सोनवणे, साम टीव्ही

नाशिक: येथील उपनगर परिसरात शेतजमिनीच्या वादातून जीवघेणा हल्ला आणि पिकांची मोठ्या प्रमाणात नासधूस केल्याची गंभीर घटना उघडकीस आली आहे. याप्रकरणी सुरेश रंगा बोराडे (५५, रा. पिंपळगाव खांब, ता. जि. नाशिक) यांच्या फिर्यादीवरून नाशिक कृषी उत्पन्न बाजार समितीचे माजी सभापती शिवाजी पांडुरंग चुंभळे (रा. लेखा नगर, इंदिरानगर) आणि त्याच्या ६ ते ७ साथीदारांविरुद्ध उपनगर पोलिस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, १४ एप्रिल रोजी सकाळी साडेअकराच्या सुमारास आरोपी हे बोराडे यांच्या शेतात जबरदस्तीने घुसले. त्यांनी बोराडे यांच्यावर चाकूने हल्ला करण्याचा प्रयत्न केला; मात्र त्यांनी तो चुकवला. त्यानंतर आरोपींनी त्यांना शेतातून पळवून लावले. तसेच त्यांच्या पुतण्या योगेश बोराडे यालाही जिवे मारण्याची धमकी देत हुसकावून लावण्यात आले. फिर्यादी विरोध करत नसल्याचे पाहून आरोपींनी शेतातील फ्लॉवर पिकावर नांगर फिरवून मोठे नुकसान केले.

या कृत्यातून शेतजमीन बळकावण्याचा प्रयत्न केल्याचा आरोप आहे. १६ एप्रिल रोजी या प्रकरणी गुन्हा दाखल करण्यात आला असून तपास पोलिस उपनिरीक्षक सपकाळे करत आहेत. आरोपींचा शोध सुरू आहे. या प्रकारानंतर संशयित आरोपींनी फिर्यादीलाच त्याच्या शेतातून पळवून लावले.

शिवाजी चुंभळे याच्यावर जमिनी बळकावणे, धमकावणे आणि खंडणी मागणे यांसारखे अनेक गंभीर गुन्हे दाखल असून तो एक कुख्यात गुंड म्हणून ओळखला जातो. नाशिक शहरासह पाथर्डी परिसरात त्याने स्वतःची दहशत निर्माण केली असून, बळजबरीने जमिनी हडपण्याचे प्रकारही समोर आले आहेत. त्याच्या या गुन्हेगारी कृत्यांमुळे स्थानिक नागरिकांमध्ये भीतीचे वातावरण पसरले आहे. चुंभळेवर कठोर कायदेशीर कारवाई करून त्याची रवानगी तात्काळ तुरुंगात करावी, अशी आक्रमक मागणी आता स्थानिकांकडून केली जात आहे.