Pankaja Munde News:

'तुम्ही फक्त साथ..प्रेम..आणि आशीर्वाद द्या..पैसे नको..असं म्हणत भाजप नेत्या पंकजा मुंडे यांनी यांनी समर्थकांची मदत नाकारली आहे. पंकजा मुंडे यांच्या वैद्यनाथ कारखान्यावर झालेल्या कारवाई नंतर राज्यभरातून मुंडे समर्थकांनी मदतीचे अभियान सुरु केलं आहे.

आतापर्यंत जवळपास 7 कोटीपेक्षा जास्त रुपयांचे चेक समर्थकांनी जाहीर केले आहेत. मात्र पंकजा मुंडे यांनी आता हा निधी नको, अशी भूमिका घेतली आहे. 'तुम्ही फक्त साथ..प्रेम..आणि आशीर्वाद द्या, असे भावनिक आवाहनही पंकजा मुंडे यांनी केले आहे. (Latest Marathi News)

पंकजा मुंडे यांनी एक व्हिडिओ सोशल मीडियावर शेअर केला आहे. या व्हिडिओत त्यांनी कार्यकर्त्यांकडून आशीर्वाद मागितले. 'माझ्या अडचणीत आपण सर्व उभे राहिलात यामुळे गहिवरून आले आहे. आपण ज्या पद्धतीने मदत देत आहात, ते खरच आपलं मोठंपण. आपल्या घरातलं किडूक मिडूक विकून आपण जे मदत निधीवर शून्यावर शुन्य लावत आहात, ते माझ्यासाठी डोळे दिपवणारं आहे, अशा मुंडे म्हणाल्या.

'आता तसं करु नका. यातून काय मार्ग काढायचा यासाठी मी वकीलांचे, सीएंचे सल्ले घेत आहे, त्यातून मी योग्य मार्ग काढेल. त्यामुळे मला पैसे देऊ नका, फक्त आशीर्वाद द्या, अशा पंकजा मुंडे पुढे म्हणाल्या.

'गोपीनाथ मुंडे साहेबांनी आपल्यात स्वाभिमान पेरला आहे. आपण त्याच स्वाभिमानाने या प्रसंगातून जाऊ. पण मी देणारी आहे. कितीही वाईट वेळ आली तरी आई आपल्या लेकराच्या ताटातलं घेत नाही, अशा पंकजा मुंडे पुढे म्हणाल्या.

'कोणी कितीही टीका केली तरी मी तुमच्या आईच्या भूमिकेत आहे. तुम्ही 20 कोटीच काय 40 कोटी सुद्धा जमवाल, पण तुमच्या संसारातलं, तुमच्या लेकरांच्या लग्नासाठी ठेवलेलं असं मला नको. फक्त साथ, प्रेम आणि आशीर्वाद द्या' असे पंकजा मुंडे यांनी म्हटले आहे.