Thane Niranjan Davkhare Brother Prabodh Davkhare Joins Ajit Pawar NCP राजकीय क्षेत्रातून मोठी बातमी समोर आली आहे. दिवंगत नेते वसंत डावखरे यांचे चिरंजीव आणि निरंजन डावखरे यांचे बंधू प्रमोद डावखरे यांनी राष्ट्रवादी काँग्रेसमध्ये प्रवेश केला आहे. बुधवारी मुंबईत राष्ट्रवादी काँग्रेसच्या वरिष्ठ नेत्यांच्या उपस्थितीत हा पक्षप्रवेश सोहळा पार पडला. यावेळी मंत्री छगन भुजबळ, सुनील तटकरे आणि माजी मंत्री दिलीप वळसे पाटील यांची विशेष उपस्थिती होती. भाजप नेते निरंजन डावखरे यांचे मोठे बंधू प्रबोध डावखरे यांच्या पक्षप्रवेशाने राजकीय वर्तुळात चर्चांना उधाण आणले.

पक्षप्रवेशावेळी छगन भुजबळ यांनी प्रबोध डावखरे यांचे स्वागत करताना त्यांच्या वडिलांचा उल्लेख केला. “वसंत डावखरे हे आजातशत्रू होते. त्यांच्या कार्यशैलीत कुठेही कटुता नव्हती. त्यांचे विचार पुढे नेण्यासाठी प्रबोध डावखरे राष्ट्रवादीत आले आहेत, ही आनंदाची बाब आहे,” असे भुजबळ म्हणाले. तसेच पक्षात सर्वांना समान वागणूक दिली जाते, असा विश्वासही त्यांनी व्यक्त केला.

राष्ट्रवादीचे ज्येष्ठ नेते दिलीप वळसे पाटील यांनीही प्रबोध डावखरे यांच्या प्रवेशाचे स्वागत करत विश्वास व्यक्त केला. “प्रबोध डावखरे हे यशस्वी व्यावसायिक असून राज्यभरात त्यांनी ३० जिम्स उभारल्या आहेत. ठाणे जिल्ह्यात त्यांचा मोठा संपर्क आहे. पक्षाच्या संघटनात्मक बळकटीसाठी ते महत्त्वाची भूमिका बजावतील,” असे वळसे पाटील म्हणाले.

प्रबोध डावखरे यांच्या वडिलांनी राज्याच्या राजकारणात महत्त्वाची भूमिका बजावली होती. त्या परंपरेचा वारसा पुढे नेत प्रबोध डावखरे आता सक्रिय राजकारणात उतरले आहेत. दरम्यान, या पक्षप्रवेशामुळे ठाणे आणि परिसरातील राजकीय समीकरणांवर काय परिणाम होणार, याकडे सर्वांचे लक्ष लागले आहे. आगामी निवडणुकांच्या पार्श्वभूमीवर हा निर्णय राष्ट्रवादीसाठी किती फायदेशीर ठरेल, हे पाहणे महत्त्वाचे ठरणार आहे.