केंद्रीय गृहमंत्री अमित शाह हे राजकारणातले चाणक्य, विकासपुरुष , पोलादी पुरुष असल्याचं गौरवोद्गार उपमुख्यमंत्री एकनाथ शिंदे यांनी केले. एकनाथ शिंदे हे कोल्हापूर दौऱ्यावर आहेत. त्याआधी अमित शाह यांनी एकनाथ शिंदेंचं कौतुक केलं होतं. आता हाती आलेल्या वृत्ताने राजकीय वर्तुळात खळबळ उडवून दिली आहे. भाजपकडून एकनाथ शिंदेंना थेट मुख्यमंत्री पदाची ऑफर देण्यात आल्याची चर्चा राजकीय वर्तुळात आहे.

अ‍ॅडव्होकेट असिम सरोदे यांनी याबाबत सोशल मीडिया साईट एक्सवर पोस्ट केली आहे. सरोदे यांच्या पोस्टमुळे राज्यातील राजकारणासह देशभरातील राजकारणात खळबळ उडाली आहे. एका बड्या नेत्यानं दिलेल्या माहितीनुसार, भाजपने एकनाथ शिंदेंना मुख्यमंत्रीपदाची ऑफर दिली आहे. मात्र त्यासाठी विलीनकरणाची मोठी अट ठेवली आहे, असं सरोदे यांनी आपल्या पोस्टमध्ये म्हटलंय.

एकनाथ शिंदे यांनी शिवसेनेत पहिल्यांदा बंड करत अनेक खासदार आणि आमदारांना फोडलं होतं. दरम्यान एकनाथ शिंदे यांच्या उठावामुळे तत्कालीन महाविकास आघाडी सरकार अल्पमतात आलं. त्यामुळे उद्धव ठाकरे यांना मुख्यमंत्रिपदाचा राजीनामा द्यावा लागला. उद्धव ठाकरे यांच्या राजीनाम्यानंतर भाजपच्या पाठिंब्याने एकनाथ शिंदे यांनी मुख्यमंत्रिपदाची शपथ घेतली.

आता दुसऱ्यांदा एकनाथ शिंदेंनी उद्धव ठाकरेंच्या गटाला खिंडार पाडलं. यावेळी एकनाथ शिंदेंनी ठाकरे गटातील ५ खासदारांना फोडलंय. हे सर्व खासदार शिवसेना शिंदे गटात प्रवेश करणार असल्याची माहिती समोर येतेय. या खासदारांनी जर शिवसेना शिंदे गटात प्रवेश केला तर केंद्रामध्ये शिवसेना शिंदे गटाचं बळ वाढणार आहे. दरम्यान शिंदेंच्या या ऑपरेशन टायगरमुळे भाजप त्यांच्यावर खूश असल्याचं दिसत आहे. भाजपचे ज्येष्ठ नेते अमित शाह यांनीही त्यांचे कौतुक केलंय.

त्याचदरम्यान वकील असिम सरोदे यांच्या एका एक्सवरील पोस्टमुळे मोठी खळबळ उडाली आहे. सरोदे यांच्या पोस्टनुसार भाजपनं एकनाथ शिंदेंना मुख्यमंत्रिपदाची ऑफर दिली आहे. त्यासाठी भाजपनं एक अट ठेवली आहे, तेी अट म्हणजे शिवसेनेला भाजपमध्ये विलीन करण्यास सांगितलंय.

काय आहे पोस्ट

भाजपने एकनाथ शिंदेंना मुख्यमंत्रीपदाची ऑफर दिली आहे, अशी माहिती अतिशय खात्रीशीर सूत्रांकडूनच नाही तर काही मोठ्या व प्रतिष्ठित लोकांकडून मिळतेय. खरी गमंत म्हणजे मुख्यमंत्री पदाच्या बदल्यात भाजपने शिंदे समोर एक अट ठेवली आहे की शिंदे गट भाजपमध्ये विलीन करायचा. राजकारण मजेशीर वळणावर आलेले दिसत असले तरी देवेंद्र फडणवीस फॅक्टर निस्तेज करण्याची तयारी हा त्यातील गंभीर भाग आहे. फडणवीस नेहमी शिंदेंना पाण्यात बघतात व मराठा नेतृत्वाचा आपल्याला धोका आहे असे त्यांना वाटते. बघूया काय काय घडतंय ?