कोल्हापूर : शिवसंग्रामचे अध्यक्ष आणि माजी आमदार विनायक मेटे (Vinayak Mete) यांचं कार अपघातात निधन झालं. मुंबई-पुणे एक्सप्रेस वेवर रविवारी पहाटेच्या सुमारास त्यांच्या कारला भीषण अपघात (Accident) झाला. अपघातात मेटे गंभीर जखमी झाले होते. त्यानंतर त्यांना रुग्णालयात दाखल करण्यात आलं. मात्र उपचार सुरू असताना त्यांची प्राणज्योत मालवली. (Chandrakant Patil Todays News)

दरम्यान, मेटे यांच्या अपघाती मृत्यूनंतर आता शिवसंग्रामच्या कार्यकर्ते आणि पदाधिकाऱ्यांकडून घातपाताचा संशय व्यक्त केला जात आहे. त्यांच्या पत्नी ज्योती मेटे यांनी देखील काहीतरी वाईट घडल्याचा संशय व्यक्त केला आहे. यावर भाजप नेते आणि महाराष्ट्राचे उच्च आणि तंत्रशिक्षण मंत्री चंद्रकांत पाटील (Chandrakant Patil) यांनी प्रतिक्रिया दिली.

काय म्हणाले चंद्रकांत पाटील?

चंद्रकांत पाटील हे आज कोल्हापुरात आले. त्यानंतर त्यांनी माध्यमांसोबत संवाद साधला. विनायक मेटे यांचा घातपात झाला असल्याच्या संशयाबाबत पत्रकारांनी प्रश्न विचारलं असता, 'विनायक मेटे यांच्यासोबत घातपात झाला असेल, तर त्याच्या मुळापर्यंत मुख्यमंत्री जातील. घटनेची सविस्तर चौकशी होईल', असं चंद्रकांत पाटील यांनी म्हटलं आहे. (Vinayak Mete Latest News)

पुढे बोलताना चंद्रकांत पाटील म्हणाले की, 'या संपूर्ण प्रकरणाची चौकशी होईल. आताच मला असंही कळालं आहे की, या अपघाताला जबाबदार असलेला ट्रक हा गुजरातमधील सुरत येथे सापडला आहे. आता ट्रक सापडला, त्यामुळे चालकही सापडेल. मग या घटनेची चौकशीही होईल. याक्षणी संबंधित घटनेबाबत मी मत व्यक्त करणं बरोबर नाही. पण हा जर घातपात असेल तर मुख्यमंत्री त्याच्या मुळापर्यंत जातील' असं चंद्रकांत पाटील म्हणाले.

Edited By - Satish Daud