Eknath Shinde, Chandrakant Raghuvanshi : महायुतीमधील अंतर्गत वाद पुन्हा एकदा चव्हाट्यावर आला आहे. शिंदे गटाच्या एका ज्येष्ठ नेत्याने युतीमधील मित्रपक्ष भाजपलाच थेट डिवचले आहे. "एकनाथ शिंदेंमुळेच भाजप जिवंत आहे, अन्यथा पक्षाचे अस्तित्व उरले नव्हते," असे वादग्रस्त वक्तव्य शिवसेना (शिंदे गट) नेते व आमदार चंद्रकांत रघुवंशी यांनी केले आहे. रघुवंशी यांच्या या विधानामुळे राजकीय वर्तुळात गदारोळ माजला असून चर्चेला उधाण आले आहे.

नंदुरबार येथे पत्रकारांशी संवाद साधताना चंद्रकांत रघुवंशी म्हणाले की, महायुती सरकार हे तीन पक्षांचे मिळून बनलेले सरकार आहे आणि तिन्ही पक्ष या सरकारमध्ये दावेदार आहेत. पण भाजपला एकनाथ शिंदे यांनीच संजीवनी दिली आहे. महाविकास आघाडीच्या काळात भाजप कुठे सत्तेत होती? एकनाथ शिंदे यांनी उठाव केला म्हणूनच भाजप आज राज्यात सत्तेत आली आहे.

चंद्रकांत रघुवंशी यांनी यावेळी भाजप नेते व माजी मंत्री डॉ. विजयकुमार गावित यांच्यावरही निशाणा साधला. ते म्हणाले की, एकनाथ शिंदेंच्या उठावामुळेच डॉ. विजयकुमार गावित यांची लॉटरी लागली आणि ते अडीच वर्ष आदिवासी विकास मंत्री राहिले. नंदुरबार जिल्ह्यातील महायुतीमधील वाद जुनाच असून, रघुवंशी यांच्या या ताज्या वक्तव्यामुळे भाजप आणि शिवसेना शिंदे गटातील दरी आणखी रुंदावण्याची शक्यता वर्तवली जात आहे.