नाशिक, ता. २ ऑगस्ट २०२४

राज्यात विधानसभा निवडणुकांचे वारे वाहू लागले असून जागा वाटपावरुन महायुती तसेच महाविकास आघाडीमधील घटक पक्षांमध्ये राजकारण रंगण्याची शक्यता आहे. राष्ट्रवादी अजित पवार गटाने नरहरी झिरवळ यांची उमेदवारी घोषित केल्यानंतर शिवसेना शिंदे गटाने आव्हान दिले होते. त्यानंतर आता मविआमध्ये ठाकरे गट आणि शरद पवार गटातही नाशिकच्या जागेवरुन वाद पेटला आहे. काय आहे प्रकरण? वाचा सविस्तर...

जागा वाटपावरुन आघाडीत बिघाडी?

नाशिकमध्ये विधानसभेच्या जागा वाटपावरुन महायुतीनंतर महाविकास आघाडीमध्येही वाद रंगण्याची चिन्हे दिसत आहेत. महाविकास आघाडीमध्ये अद्याप जागावाटप झालेले नसताना ठाकरे गटाकडून नाशिक मध्य आणि पश्चिम विधानसभा मतदारसंघासाठी उमेदवारांच्या नावाचा ठराव करण्यात आला. यावरुनच शरद पवार गटाने नाराजी व्यक्त केली आहे.

ठाकरेंचा दावा; राष्ट्रवादी, काँग्रेसचे आव्हान!

ठाकरे गटाकडून नाशिक मध्य आणि पश्चिमच्या उमेदवारांचे नाव एक मतांनी ठरवण्यात आले, त्यांना शुभेच्छा असा खोचक टोला राष्ट्रवादी शरद पवार गटाचे नेते आणि माजी आमदार नितीन भोसले यांनी लगावला आहे. दुसरीकडे नाशिक मध्यची जागा कोणत्याही परिस्थितीत काँग्रेस पक्षाला सुटली पाहिजे, असा ठराव झाल्याचे काँग्रेस प्रवक्त्या हेमलता पाटील यांनी म्हटले आहे.

महायुतीमध्येही जागा वाटपावरुन कलह!

महायुतीमध्येही जागा वाटपावरुन कलह सुरू झाला आहे. माजी पोलीस अधिकारी प्रदीप शर्मा यांच्या पत्नी स्वकृती शर्मा यांनी शिवसेना शिंदे गटात प्रवेश केला. शर्मा यांना शिंदे गटाकडून मुंबई उत्तर-पश्चिम मतदारसंघातून उमेदवारी दिली जाण्याची शक्यता असतानाच भाजपने या जागेवर दावा केला आहे. भाजपचे आमदार अमित साटम यांनी ही जागा भाजपचे मुरजी पटेल लढवणार असल्याचे सांगितले आहे.

दुसरीकडे दोन दिवसांपूर्वी सुनील तटकरे यांनी दिंडोरीमधून नरहरी झिरवळ यांना पुन्हा उमेदवारी देण्याची घोषणा केली. यावर शिवसेना शिंदे गटाचे माजी आमदार धनराज महाले यांनी नाराजी व्यक्त करत शिंदेंनी मला शब्द दिल्याचे सांगितले आहे. त्यामुळे आगामी काळात जागा वाटपावरुन महायुतीत वाद रंगण्याची शक्यता आहे.