शुभम देशमुख 
भंडारा : छत्रपती संभाजीनगर इथून कार चोरून त्यातून प्रतिबंधित असलेला डोडा (अफुचे टरफल) भंडारा मार्गे विक्रीसाठी नेण्यात येत होता. याच दरम्यान भंडारा पोलिसांनी कारवाई करत प्रतिबंधित असलेल्या ३०७ किलो डोडा जप्त केला आहे. तसेच या कारवाईत वाहतूक करणाऱ्या राजस्थानच्या दोघांना पोलिसांनी ताब्यात घेतले आहे. 

भंडाऱ्यात पोलिसांनी केलेल्या कारवाईत राजस्थान मधील दोघांना ताब्यात घेतलं आहे. दिलीप बिश्नोई (वय २४) आणि जयप्रकाश बिस्नोई (वय २५) असं या प्रतिबंधित पदार्थाची वाहतूक करताना भंडारा पोलिसांनी ताब्यात घेतलेल्या दोघांची नावं आहेत. हे दोघेही राजस्थान मधील जोधपुर जिल्ह्यातील फलोदी येथील आहे. या दोघांनी प्रतिबंधित पदार्थांची वाहतूक करण्याकरिता छत्रपती संभाजीनगर येथून वाहन चोरी केले. 

चोरीच्या वाहनातून डोडा वाहतूक 

चोरी केलेल्या या वाहनात १६ पोत्यांमध्ये ३०७ किलो हे प्रतिबंधित पदार्थ भरून त्याची वाहतूक करीत होते. दरम्यान चोरी केलेल्या हा वाहनाला जीपीएस लागलं असल्यानं छत्रपती संभाजीनगरचे पोलीस या वाहनाच्या मागावर होते. सदर वाहन भंडाऱ्याच्या दिशेने जात असल्याचे समजल्यानंतर याची माहिती त्यांनी भंडारा पोलिसांना दिली होती. त्यानुसार भंडारा पोलिसांनी सापळा रचला होता. 

हॉटेलवर थांबले असता पोलिसांची कारवाई 

नागपूर ते भंडारा राष्ट्रीय महामार्गावर असलेल्या एका हॉटेलमध्ये हे दोघेही थांबले असताना भंडारा पोलिसांनी सापळा रचून त्यांना ताब्यात घेतलं. या कारवाईत भंडारा पोलिसांनी प्रतिबंधित पदार्थ आणि वाहन असा ८५ लाखांचा मुद्देमाल जप्त केला आहे. जवाहरनगर पोलिसात गुन्ह्याची नोंद करण्याची प्रक्रिया सध्या सुरू आहे. भंडारा पोलिसांचे सध्या जागर नशा मुक्ती अभियान सुरू असून या अभियानादरम्यान करण्यात आलेली ही सर्वात मोठी कारवाई आहे.