शुभम देशमुख, साम टीव्ही

भंडारा : भंडाऱ्यात पेटी वाटपाच्या कार्यक्रमात महिलांची तुफान गर्दी झाली. या महिलांची गर्दी पांगवण्यासाठी पोलिसांनी सोम्य लाठीचार्ज करावा लागला. यानंतर महिलांची चेंगराचेंगरी झाली. या चेंगराचेंगरीत पाच ते सहा महिला गंभीर जखमी झाल्या आहेत. भंडाऱ्यातील अग्रेसन भवन या ठिकाणी ही घटना घडली आहे.

चेंगराचेंगरीत काही महिला गंभीर जखमी

मिळालेल्या माहितीनुसार, भंडाऱ्यातील कामगार कार्यालयाच्या माध्यमातून अग्रेसन भवन मंगल कार्यालयात पेटी वाटपाचा कार्यक्रम आयोजित करण्यात आला होता. या ठिकाणी असलेल्या पोलिसांनी महिलांवर सोम्य लाठीचार्ज करून करून गर्दी पांगवण्याचा प्रयत्न केला. त्यानंतर झालेल्या चेंगराचेंगरीत पाच ते सहा महिला गंभीर जखमी झाल्याची माहिती हाती समोर आली आहे.

नेमकं काय घडलं?

मागील काही दिवसांपासून पेटी मिळावी, यासाठी भंडाऱ्यातील ग्रामीण भागातील महिलांची एकच गर्दी झाली. भंडाऱ्यातील नागपूर रायपूर राष्ट्रीय महामार्गावरील अग्रेसन भवन येथे पेटी वाटपाचा कार्यक्रम आयोजित करण्यात आला होता. यासाठी मध्यरात्रीपासून भंडारा जिल्ह्यातील ग्रामीण भागातून मोठ्या प्रमाणात महिला उपस्थित झाल्या होत्या. ही गर्दी पांगवण्यासाठी पोलिसांची मदत घेण्यात आली होती.

'लाडक्या बहिणीं'वर लाठीचार्ज'

या कार्यक्रमात मोठ्या प्रमाणात जमा झालेल्या महिलांना पांगवण्यासाठी पोलिसांनी सोम्य लाठीचार्ज केला. यामुळे काही महिला गंभीर जखमी झाल्या आहेत. या जखमी महिलांवर भंडारा जिल्हा सामान्य रुग्णालयात उपचार सुरु आहेत. एकीकडे राज्यात मुख्यमंत्री लाडकी बहीण योजना येत असताना भंडाऱ्यामध्ये लाडक्या बहिणींवर पोलिसांकडून लाठीचार्ज करण्यात आल्याची घटना घडली आहे.