शुभम देशमुख 
भंडारा : भंडारा जिल्ह्यातील सहा पंचायत समितीच्या सभापती व उपसभापती पदाची निवड करण्यासाठी आज निवडणुक प्रक्रिया पार पडली. यात जिल्ह्यातील चार पंचायत समितींवर महायुतीचा झेंडा अर्थात भाजप व राष्ट्रवादी अजित पवार गट यांनी सत्ता काबीज केली. तर दोन पंचायत समितींवर महाविकास आघाडीला समाधान मानावे लागले. या निवडीनंतर जिल्हा परिषदेकडे लक्ष आहे. 

भंडारा जिल्हा परिषदेसह सर्व पंचायत समितीच्या अडीच वर्षाच्या कार्यकाळ पूर्ण झाला आहे. हि मुदत संपल्याने पुढील अडीच वर्षासाठी सभापती व उपसभापती निवड करण्यासाठी आज निवडणूक प्रक्रिया पार पडली. यामध्ये भंडारा जिल्ह्यातील तुमसर, मोहाडी, भंडारा, लाखांदूर या ठिकाणी भाजपसह राष्ट्रवादी अजित पवार गटाचा वर्चस्व दिसून आले. तर लाखनी व पवनी या ठिकाणी महाविकास आघाडीला समाधान मानावे लागले. 

अशी झाली निवड 

लाखांदूर पंचायत समितीचे सभापती म्हणून भाजपचे पुरुषोत्तम ठाकरे तर राष्ट्रवादी काँग्रेसचे उपसभापती संजना वरखडे, लाखनी पंचायत समितीमध्ये काँग्रेसचे अश्विनी कानेकर सभापती, उपसभापती पदी सुनील बांते, मोहाडी पंचायत समितीवर सभापतीपदी राष्ट्रवादी काँग्रेसचे जगदीश शेंडे, तर भाजपचे देवा चकोले यांची उपसभापतीपदी निवड झाली. पवनी पंचायत समितीमध्ये काँग्रेसचे नारनवरे हे सभापती म्हणून तर उपसभापती भाजपचे प्रमोद मेंढे यांची निवड झाली. भंडारा पंचायत समितीमध्ये भाजपच्या कल्पना कुर्जेकर यांची सभापती म्हणून तर उपसभापती म्हणून राष्ट्रवादीचे नागेश भगत यांची निवड झाली. तुमसर पंचायत समितीमध्ये सभापतीपदी राष्ट्रवादीच्या दीपा गौपाले तर उपसभापती भाजपच्या सुभाष बोरकर यांची निवड झाली. 

आता जिल्हा परिषदेकडे लक्ष 

जिल्ह्यातील सर्व पंचायत समितीची सभापती, उपसभापती निवडणुकीची प्रक्रिया पार पडली आहे. यात महायुती व महाविकास आघाडीचा चांगलाच कस लागल्याचे पाहण्यास मिळाले. तर आता २७ जानेवारीला जिल्हा परिषदेच्या अध्यक्ष व उपाध्यक्ष पदासाठी निवडणूक होणार आहे. यामुळे जिल्हा परिषदेवर कोणाची सत्ता स्थापन होते व अध्यक्ष व उपाध्यक्ष पदी कोणाची वर्णी लागते याकडे आता सर्वांचे लक्ष लागलेले आहे.