शुभम देशमुख 
भंडारा : राज्यातील अनेक भागात अजूनही जोरदार पावसाचा तडाखा बसत आहे. यात सोलापूर, भंडारा जिल्ह्यात काल जोरदार तडाखा बसला आहे. यातच भंडारा जिल्ह्यात सायंकाळच्या सुमारास विजांच्या कडकडाटासह पावसाने हजेरी लावली. यामध्ये जिल्ह्यात वीज कोसळल्याच्या दोन घटना घडल्या असून एका गुराख्याचा मृत्यू झाला आहे. तर दुसऱ्या घटनेत घराचे नुकसान झाले आहे. 

राज्यात दोन आठवड्यांपूर्वी सर्वदूर मुसळधार पाऊस सुरु होता. तर मागील आठवड्यापासून पावसाने काहीशी विश्रांती घेतली होती. मात्र पुन्हा एकदा पावसाने हजेरी लावली असून काल सायंकाळपासून भंडारा व सोलापूर जिल्ह्यात जोरदार पावसाने हजेरी लावली आहे. विजांचा कडकडाट व वाऱ्यासह पावसाने हजेरी लावली असून यात मोठे नुकसान झाले आहे. यामध्ये भंडारा जिल्ह्यात वीज कोसळल्याच्या घटना घडल्या आहेत. 

गुराख्याच्या मृत्यू 

जिल्ह्यातील भंडारा आणि लाखनी तालुक्यात दोन ठिकाणी वीज कोसळल्याची घटना घडली. एका घटनेत भंडारा तालुक्यातील मानेगाव बाजार शेतशिवारात पाळीव जनावर चराईसाठी गेलेल्या बबन भदाडे (वय ५२) या गुराख्यावर वीज कोसळल्याने त्यांचा मृत्यू झाला. गुरांना गेले असताना अचानक विजांचा कडकडाट होण्यास सुरवात झाली. यामुळे झाडाखाली उभे असताना अचानक वीज कोसळल्याने मृत्यू झाला. या घटनेमुळे कुटुंबावर दुःखाचा डोंगर कोसळला आहे. 

वीज कोसळून घराचे नुकसान 

दुसऱ्या घटनेत लाखनी तालुक्यातील बोरगावं राजेगाव येथील दुर्गाप्रसाद लांडेकर यांच्या घरावर वीज कोसळल्याची घटना घडली आहे. यामुळे घरातील वीज उपकरणांसह काही साहित्य जळून खाक झालं. तसेच वीज कोसळल्याने घराच्या खिडक्याचे काच फुटले आहेत. तर भिंतींना तडे गेलेत. घटनेच्या वेळी घरात कुणीही नसल्यानं मोठी जीवितहानी टळली.