शुभम देशमुख 
भंडारा : तुमसर- भंडारा महामार्गावरील खापा येथे रजवी पेट्रोल पंप समोर ट्रकने मागे घेताना विद्युत खांबाला धडक दिली. ट्रकने दिलेल्या धडकेत खांब तुटला. यामुळे खांबावरील चालू विद्युत तार महामार्गावर पडले होते. यावेळी महामार्गावर वाहनांची रहदारी सुरु असल्याने यामुळे मोठी दुर्घटना होण्याची शक्यता निर्माण झाली होती. मात्र लागलीच वीज पुरवठा बंद करण्यात आल्याने अनर्थ टळला आहे. 

तुमसर- भंडारा महामार्गावरील खापा येथे आज सकाळच्या सुमारास हि घटना घडली आहे. चालकाने ट्रक मागे घेत असताना विद्युत पोल दिसला नाही. यामुळे पोलला जोरदार धडक दिली. यात खांब खाली पडून विद्युत तारा देखील तुटल्या होत्या. हा प्रकार लक्षात येताच लिलाधर वाडीभस्मे यांनी महामार्गावरील वाहतूक थांबवून तत्काळ विद्युत विभागाला माहिती दिली. विभागातील कर्मचाऱ्यांनी येऊन विद्युत पुरवठा बंद केला. त्यामुळे मोठी जीवितहानी टळली. 

मोठी दुर्घटना टळली 

दरम्यान सकाळची वेळ असल्याने महामार्गावरून येणाऱ्या जाणाऱ्या वाहनांची वर्दळ अधिक असते. दरम्यान हा अपघात घडला यावेळी फारशी रहदारी नसल्याने दुर्घटना टळली आहे. तसेच विद्युत तारा तुटून पाडल्यानंतर विद्युत विभागाच्या कर्मचाऱ्यांनी येऊन पुरवठा बंद केला. यानंतर रस्त्यावर पडलेले तार रस्त्याच्या कडेला करून व त्या खांबावरून जाणारी विद्युत पुरवठा दुसरीकडून कट करून उर्वरित परिसरातील पुरवठा काही काळाने सुरू करण्यात आली.

कोंडाईबारी घाटात ट्रकचा अपघात

नंदुरबार : तामिळनाडू राज्यातून गुजरातच्या दिशेने जात असलेल्या ट्रकचा नंदुरबार जिल्ह्यातील कोंडाबारी घाटात अपघात झाला. महामार्गावर ट्रक चालकाचे ट्रकवरील नियंत्रण सुटल्याने अपघात घडल्याचे सांगण्यात येत आहे. यामुळे महामार्गलगत असलेल्या खड्ड्यात ट्रक गेल्याने ट्रकचे मोठ्या प्रमाणात नुकसान झाले आहे. तर अपघातात ट्रक चालक गंभीररित्या जखमी झाला असून जखमी ट्रक चालक विसरवाडी ग्रामीण रुग्णालयात उपचारासाठी दाखल करण्यात आले आहे.