शुबम देशमुख, भंडारा प्रतिनिधी

पोळ्याच्या पाडव्याच्या दिवशी भंडारा जिल्ह्यातून एक अत्यंत मन हेलावून टाकणारी दुर्घटना समोर आली आहे. नागपूर-रायपूर राष्ट्रीय महामार्गावर लाखनी तालुक्यातील पिंपळगाव (सडक) येथे भीषण अपघात झाला. भरधाव पिकअप आणि ट्रकच्या धडकेत ८ मजुरांचा जागीच मृत्यू झाला असून ४ जण गंभीर जखमी झाले आहेत. या दुर्घटनेतील सर्व मृत व जखमी मजूर हे छत्तीसगड राज्यातील असल्याची प्राथमिक माहिती आहे.

मिळालेल्या माहितीनुसार, आज पहाटेच्या सुमारास साकोली-लाखनी राष्ट्रीय महामार्गावरील पिंपळगाव परिसरातील 'भाऊ ढाब्या'जवळ हा अपघात झाला. महामार्गालगतच्या एका पेट्रोल पंपावरून इंधन भरून एक ट्रक नागपूरच्या दिशेने बाहेर पडत होता; त्याच वेळी पाठीमागून अत्यंत वेगाने येणाऱ्या एका पिकअप वाहनाने या ट्रकला जोरदार धडक दिली.

धडक इतकी भीषण होती की, पिकअप वाहनाचा अक्षरशः चुराडा झाला. या पिकअपमधून सुमारे ११ ते १२ मजूर प्रवास करत होते. अपघाताची तीव्रता प्रचंड असल्याने वाहनातील ८ मजुरांचा जागीच मृत्यू झाला, तर ४ जण गंभीर जखमी झाले.

अपघाताची माहिती मिळताच राष्ट्रीय महामार्ग पोलीस आणि स्थानिक नागरिकांनी तातडीने घटनास्थळी धाव घेतली. पिकअपच्या पत्र्यात अडकलेले मृतदेह आणि जखमींना बाहेर काढण्यासाठी त्यांना मोठी कसरत करावी लागली. सर्व गंभीर जखमींना तातडीने उपचारासाठी भंडारा येथील शासकीय वैद्यकीय महाविद्यालय व रुग्णालयात दाखल करण्यात आले असून त्यांच्यावर उपचार सुरू आहेत.

रोजीरोटीच्या शोधात छत्तीसगडवरून आलेल्या या मजुरांवर सणाच्या दिवशीच काळाने घाला घातल्याने परिसरातून तीव्र हळहळ व्यक्त होत आहे. मजुरांच्या या अचानक झालेल्या मृत्यूने त्यांच्या कुटुंबीयांवर दुःखाचा डोंगर कोसळला आहे.

पिकअप चालकाचे वाहनावरील नियंत्रण सुटल्यामुळे किंवा अतिवेगामुळे हा अपघात घडला असावा, असा प्राथमिक अंदाज वर्तवला जात आहे. पिकअपमध्ये क्षमतेपेक्षा जास्त प्रवासी होते का आणि अपघाताचे नेमके कारण काय, याचा सखोल तपास महामार्ग पोलीस करत आहेत. या भीषण अपघातामुळे राष्ट्रीय महामार्गावरील वाहनांचा वेग आणि प्रवाशांच्या सुरक्षेचा प्रश्न पुन्हा एकदा ऐरणीवर आला आहे.