बीड जिल्ह्यातील पाटोदा तालुका अंतर्गत जवळाला गावात धाडसी घरफोडीची घटना उघडकीस आली आहे. चोरट्यांनी एकाच रात्रीत दोन घरे फोडून लाखो रुपयांचा ऐवज लंपास केला. या घटनेमुळे गावात भीतीचे वातावरण निर्माण झाले आहे. मिळालेल्या माहितीनुसार, पोपट मच्छिंद्र कोठुळे यांच्या घरात मध्यरात्री अज्ञात चोरट्यांनी कडी-कोंडा आणि कुलूप तोडून प्रवेश केला. घरातील कपाट फोडून तब्बल ९ लाख रुपये रोख रक्कम आणि अडीच तोळे सोन्याचे दागिने चोरून नेले. सकाळी उठल्यानंतर घरातील कपाट उघडे तर सामान अस्ताव्यस्त पडलेले दिसल्याने चोरी झाल्याचे कुटुंबाच्या लक्षात आले. त्यानंतर त्यांनी तातडीने पोलिसांत धाव घेत फिर्याद दिली.

धक्कादायक बाब म्हणजे चोरट्यांनी गावातील विद्युत डीपीमधील फ्यूज काढून अंधाराचा फायदा घेत घरफोडी केल्याची माहिती समोर आली आहे. त्यामुळे ही चोरी पूर्वनियोजित असल्याचा संशय व्यक्त केला जात आहे. आजच्या घडीला सोन्याचे दर उच्चांक गाठत असताना, कष्टाने कमावलेली रक्कम आणि भविष्यासाठी साठवलेले दागिने चोरीला गेल्याने कोठुळे कुटुंबीयांवर मोठा आर्थिक आघात झाला आहे. “माझ्या मुलाने ऊसतोडणी करून मोठ्या कष्टाने कमावलेले पैसे चोरांनी नेले. आमचे पैसे परत मिळावेत, अशी भावनिक मागणी कुटुंबातील महिलांनी केली आहे.

या प्रकरणी पाटोदा पोलीस ठाणे येथे अज्ञात चोरट्यांविरोधात गुन्हा दाखल करण्यात आला असून पोलिसांनी तपास सुरू केला आहे. परिसरात वाढत्या चोरीच्या घटनांमुळे नागरिकांनी चोरट्यांचा तातडीने बंदोबस्त करण्याची मागणी केली आहे.