बीड : बीड जिल्ह्यातून गेलेल्या धुळे- सोलापूर महामार्गावर आज सकाळी भीषण अपघात झाले. भरधाव ट्रकने दुचाकीला जोरदार धडक दिल्याने झालेल्या अपघातात दुचाकीस्वाराचा जागीच मृत्यू झाला आहे. या अपघातानंतर महामार्गावर वाहतूक खोळंबली होती. घटनेची माहिती मिळताच पोलिसांनी घटनास्थळी धाव घेत पंचनामा करून वाहतूक सुरळीत केली. 

बीड (Beed) जिल्ह्यातून जाणाऱ्या धुळे- सोलापूर महामार्गावर (Dhule Solapur Highway) अपघाताचे सत्र सुरूच आहे. गेल्या आठवड्यातच पाच वाहनांचा विचित्र अपघात झाला होता. या अपघातात ३ जण ठार झाल्याची घटना बीड बायपासवर घडली होती. ही घटना ताजी असताना पुन्हा एकदा धुळे- सोलापूर महामार्गावरील बीडच्या चौसाळा परिसरामध्ये ट्रक- दुचाकीचा भीषण अपघात (Accident) झाला. यामध्ये दुचाकीचे दोन तुकडे झाले असून दुचाकीस्वार जागीच ठार झाला आहे. ही घटना आज सकाळी घडली आहे. 

ट्रकने दुचाकीला दिलेल्या धडकेत बाळासाहेब दिलीप भोसले (वय २६) याचा मृत्यू झाला आहे. दरम्यान या घटनेनंतर नेकनूर पोलिसांनी घटनास्थळी धाव घेतली असून पुढील तपास अन कारवाई सुरू आहे. या प्रकरणी ट्रक चालकावर गुन्हा दाखल करण्याचे काम सुरु होते.