बीड : दिवाळीच्या अनुषंगाने रेशन कार्ड धारकांना रेशनच्या धान्याचे वाटप करण्यात आले. मात्र नागरिकांना दिवाळीत पुरवठा विभागाने सडलेला तांदूळ दिल्याचा संतापजनक प्रकार समोर आला आहे. वाटप करण्यात आलेल्या तांदळात किडे, अळ्या आणि बुरशी लागलेला हा तांदूळ आहे. शिवाय ज्वारीचे वाटप करण्यात आलेलीच नाही. 

बीड तालुक्यात हा धक्कादायक व संतापजनक प्रकार समोर आला आहे. रेशन धान्य लाभार्थ्यांना दर महिन्याला मोफत धान्याचे वाटप करण्यात येत असते. त्यानुसार दिवाळीच्या अनुषंगाने धान्य वाटप करण्यात आले आहे. मात्र यावेळी वाटप करण्यात आलेले धान्य खराब असल्याची ओरड होत आहे. ऐन दिवाळीच्या सणात पुरवठा अधिकारी सुपेकर यांनी तांदूळ चेक न करता बीड तालुक्यातील नागरिकांना वाटप करण्यात आला आहे. 

सडलेला तांदूळ वाटप, ज्वारी मिळालीच नाही 

रेशन धान्य वाटप करतात लाभार्थ्याला ५ किलो तांदूळ आणि ५ किलो गहु वाटप केले जात आहे‌त. तर ज्वारी मात्र देण्यात येत नाही. शेकडो रेशन दुकानावर पुरवठा विभागाने पाठवलेला तांदूळ पूर्णपणे सडलेला, किडे, आळ्या आणि निकृष्ट दर्जाचा आहे. यामुळे नागरिकांमधून संताप व्यक्त केला जात आहे. तर अतिवृष्टीने झोडपलेल्या बीड तालुक्यातील नागरिकांची प्रशासनाने अशा पद्धतीने चेष्टा केली आहे अशा प्रतिक्रिया उमटत आहेत. 

कारवाईची मागणी 

दरम्यान पुरवठा केलेला तांदूळ आरोग्यासाठी धोकादायक आहे. संबंधित अधिकाऱ्यांवर कारवाई करण्याची मागणी होत आहे. दरम्यान पुरवठा विभागाच्या अधिकाऱ्यांशी संपर्क साधला असता कुठलेही धान्य आम्ही तपासून देत नाही. जो तांदूळ खराब आहे; तो नागरिकांनी परत द्यावा. त्यांना आम्ही बदलून देऊ अशी प्रतिक्रिया दिलेली आहे.