Beed News: बीडमध्ये गुऱ्हेगारीच्या घटना सातत्याने वाढत आहेत. अशात बीडच्या एका शाळेतील शिपायाची निर्घृण हत्या करण्यात आलीये. शिपायाच्या डोक्यात दगड घालून ही हत्या झालीये. सदर घटनेनं परिसरात भीतीचं वातावरण पसरलं आहे. (Latest Marathi News)

मिळालेल्या अधिक माहितीनुसार, शिपायाची अशी निर्घृण हत्या नेमकी कोणी केली याची माहित अद्याप मिळू शकलेली नाही. पोलिस या प्रकरणी अधिक तपास करत आहेत. बीडच्या (Beed) माजलगाव शहरातील शिक्षक कॉलनीमध्ये ही धक्कादायक घटना उघडकीस आली आहे. अनिल सर्जेराव शेंडगे (वय 27) असं मयत तरुणाचं नाव आहे.

शिपाई तरुण आपल्या घरी असताना एका अज्ञात व्यक्तीचा त्याला फोन आला. फोनवरुन त्याला बायपास रोडवर बोलावण्यात आलं. तिथे गेल्यावर नराधमांनी त्याला बेदम मारहाण करत डोक्यात दगड घालून त्याची हत्या केली आहे.

ही घटना रात्री साडेआठ ते नऊ वाजण्याच्या सुमारास घडली. याप्रकरणी माजलगाव पोलिसात गुन्हा दाखल करण्याची प्रक्रिया सुरू आहे. धारूर तालुक्यातील चिखली येथील मुळ रहिवासी असलेला अनिल सर्जेराव शेंडगे मराठवाडा शिक्षण प्रसारक मंडळाच्या धारूर येथील शाळेतील शिपाई पदावर कार्यरत होता.

तसेच माजलगाव येथील मंजरथ रोड शिक्षक कॉलनी येथे तो राहत होता. त्याच्या निधनाने कुटुंबीयांवर दु:खाचा डोंगर कोसळला आहे. क्रूरतेने हत्या केल्याने गावात देखील भीतीचं वातावरण पसरलं आहे.