बीडमध्ये दिवसेंदिवस गुन्हेगारी घटनांमध्ये वाढ होत असल्याचं चित्र आहे. अशातच एक धक्कादायक प्रकार समोर आला आहे. एका विवाहित महिलेवर पिस्तुलाचा धाक दाखवत अत्याचार केल्याची घटना उघडकीस आली आहे. यानंतर संबंधित पोलीस अधिकाऱ्याविरोधात गुन्हा दाखल करण्यात आला आहे.

सहाय्यक पोलीस निरीक्षक रविंद्र शिंदे असे आरोपीचे नाव आहे. ते बीडमध्ये कार्यरत होते. त्यानंतर त्यांची धाराशिवमध्ये बदली करण्यात आली. बीडमध्ये कार्यरत असताना पोलिसाची पीडित विवाहित महिलेशी ओळख झाली. नंतर दोघांमध्ये प्रेमसंबंध निर्माण झाले. वारंवार गाठीभेटी होत असायच्या.

यानंतर आरोपीने महिलेला पिस्तूलचा धाक दाखवत स्वतः सोबत राहण्यास भाग पाडले. यादरम्यान, आरोपीची बदली धाराशिव जिल्ह्यात झाली. यानंतर देखील त्यानं पिस्तूलाचा धाक दाखवत पीडितेसोबत अत्याचार केला. तसेच शिविगाळ करत जीवे मारण्याचीही धमकी दिली. पीडितेनं आरोपीसोबत धाराशिवमध्ये राहण्यास नकार दिल्यामुळे त्यानं विवाहितेला धमकी दिली.