बीड, ता. २७ सप्टेंबर

Manoj Jarange Patil, Pankaja Munde Banner: भारतीय जनता पक्षाचे बीड जिल्हाध्यक्ष राजेंद्र मस्के यांनी लावलेल्या बॅनरची सध्या राजकीय वर्तुळात चांगलीच चर्चा रंगली आहे. राजेंद्र मस्के यांनी भाजप नेत्या आणि विधानपरिषदेच्या आमदार पंकजा मुंडे यांच्यासह मराठा आरक्षणाचे नेते मनोज जरांगे पाटील यांचे फोटो असलेले फ्लेक्स झळकावले आहेत. विशेष म्हणजे या बॅनरवर भाजपचे चिन्ह अन् उल्लेखही टाळल्याने राजकीय वर्तुळात चर्चा रंगल्या आहेत.

याबाबत सविस्तर माहिती अशी की, बीड भाजपाचे जिल्हाध्यक्ष व पंकजा मुंडे यांचे निकटवर्ती असलेल्या राजेंद्र मस्के यांनी लावलेले बीड शहरातील बॅनर चर्चेचा विषय ठरला आहे. मस्के यांनी लावलेल्या बैलगाडा शर्यतीच्या बॅनरवर पक्षाचे चिन्ह आणि उल्लेख टाळला आहे. एका बॅनरवर मनोज जरांगे पाटील यांचा फोटो टाकला आहे. ज्यावर पक्षाचा उल्लेख हि टाळला आहे.

तर दुसऱ्या बॅनरवर भाजपच्या पंकजा मुंडे यांचा फोटो टाकला आहे. त्या बॅनरवर मनोज जरांगे पाटील यांचा फोटो टाळला आहे. या दोन्ही बॅनरवर पक्षाचे चिन्ह आणि उल्लेख टाळला आहे. त्यामुळे नेमकं जिल्हाध्यक्षाचे प्रेम कुणावर? असा प्रश्न विचारत हे बॅनर सोशल मीडियावर व्हायरल होत आहेत.

दरम्यान, राजेंद्र मस्के हे भाजप नेत्या पंकजा मुंडे यांच्या कट्टर समर्थक म्हणून ओळखल्या जातात. मागील वर्षी बैलगाडा शर्यतीमध्ये पंकजा मुंडे यांनी राजेंद्र मस्के यांची उमेदवारी बीडमधून जाहीर केली होती. अशातच राजेंद्र मस्के यांचे हे फ्लेक्स सर्वांचे लक्ष वेधत आहेत. तसेच आगामी विधानसभा निवडणुकीच्या पार्श्वभूमीवर या बॅनरची मोठी चर्चा होत आहे.