बीड : रात्रीच्या अंधाराचा फायदा घेत चोरटे चोरी करून पसार होत असतात. दरम्यान अंबाजोगाईमध्ये चोरीच्या उद्देशाने चोरटे घराजवळ दाखल झाले. मात्र याच वेळी सीसीटीव्हीचा सायरन वाजला. या सायरनचा आवाज आल्याने चोरीच्या तयारीत असणाऱ्या चोरट्यांच्या टोळीने घटनास्थळावरून पळ काढून धूम ठोकली. चोरट्यानी धूम ठोकतानाचे दृश्य सीसीटीव्ही कॅमेरात कैद झाले आहेत.

बीडच्या अंबाजोगाई शहरामध्ये चोरट्यांची दहशत पसरत असल्याचं चित्र पाहायला मिळत आहे. दिवसेंदिवस चोरीच्या घटना वाढत आहेत. या अनुषंगाने अंबाजोगाई शहरातील विविध भागांमध्ये सीसीटीव्ही कॅमेरे अन् सायरन बसवण्यात आले आहेत. याचा फायदा रहिवाशांना होत असल्याचे काळ रात्रीच्या घटनेवरून लक्षात येत आहे. अर्थात सीसीटीव्हीचा सायरन वाजल्यामुळे चोरीची घटना टाळली आहे. 

पाच चोरट्यांच्या टोळीने ठोकली धूम 
अंबाजोगाई शहरातील दुर्गा नगर एलआयसी रोड या ठिकाणी २३ जानेवारीच्या पहाटे पावणे तीन वाजेच्या सुमारास पाच चोरांची टोळी आली होती. ते चोरी करण्याच्या उद्देशाने परिसरात फिरत होते. परंतु कॉलनीत लावलेल्या सीसीटीव्ही कॅमेऱ्याचे सायरन वाजल्यामुळे त्यांनी लगेच धूम ठोकली. कॅमेरा क्रमांक दोन आणि कॅमेरा क्रमांक तीन मध्ये हे पाचही चोर दिसून येत आहेत. 

गावकऱ्यांनी चोरट्यांचा डाव हाणून पाडला
धाराशिव : धाराशिव जिल्ह्यात चोऱ्यांचे सत्र थांबायचं नाव घेत नाही. यातच तुळजापूर तालुक्यातील किलज येथील गावकऱ्यांनी गावातील जिल्हा परिषद शाळा परिसरात चोरी करण्यासाठी दबा धरून बसलेल्या चोरट्याला पकडुन चांगलाच चोप दिला. दरम्यान यातील दोघेजन पळुन गेले आहेत. तर एकाला गावकऱ्यांनी पकडून ठेवले. त्यानंतर त्याला नळदुर्ग पोलिसांच्या ताब्यात देण्यात आले. किलजसह परिसरात चोरट्यांनी धुमाकूळ घातला असुन वाढत्या चोऱ्या रोखण्यासाठी पोलिसांनीच बंदोबस्त करावा अशी मागणी गावकरी करत आहेत.