बारामती : अवैध गॅसचा वापर मोठ्या प्रमाणात वाढला आहे. गाड्यांमध्ये अवैधपणे गॅस भरला जात असतो. अशात गॅस लिकेज होऊन आग लागल्याच्या घटना घडल्या आहेत. त्यानुसार बारामतीमधील पळसदेवमध्ये ऐन उन्हाळ्यात ओमनी व्हॅनला आग लागली आहे. बेकायदेशीरपणे एलपीजी गॅस भरताना आग लागल्याची चर्चा असून सुदैवाने यात कोणत्याही प्रकारची जीवितहानी झाली नाही. 

पुण्याच्या इंदापूर तालुक्यातील पळसदेव गावात ऐन उन्हाळ्यात ओमनी कारला आग लागल्याची घटना घडली आहे. मानवी लोकवस्तीत या कारला आग लागल्याने लोणी देवकर औद्योगिक वसाहतीतील आर्यन पप्स या कंपनीच्या मदतीने तात्काळ आग आटोक्यात आणण्यात आली. जर ही आग भडकली असती तर मोठा अनर्थ घडला असता.

सुदैवाने मोठी दुर्घटना टळली 
पळसदेव गावात अनधिकृतरीत्या एलपीजी गॅस सिलिंडरमधून व्हॅनमध्ये गॅस भरला जात होता. याचवेळी अचानकपणे गॅस लिक झाला आणि आग लागली. वाहनाने पेट घेतला आणि आग नियंत्रणाबाहेर गेली. आग लागल्याची घटना ज्या ठिकाणी घडली, त्या ठिकाणी मानवी लोकवस्ती आहे. कारला लागलेल्या आगीचा भडका उडाला असता तर ही आग भडकून मोठा अनर्थ घडला असता. मात्र सुदैवाने हि दुर्घटना टळली आहे. 

गॅसचा अनधिकृत वापर वाढला  

दरम्यान ही आग नेमकी कशामुळे लागली; याचं ठोस कारण समोर आलेले नाही. मात्र बेकायदेशीरपणे एका ओमनी व्हॅनमध्ये घरगुती वापराच्या एलपीजी टाकीमधून गॅस भरत असताना गॅसची गळती होऊन गाडीने पेट घेतल्याची चर्चा आहे. अर्थात या घटनेमुळे पुन्हा एकदा घरगुती गॅसचा अनधिकृत होत असलेला वापर समोर आला आहे.