मयुरेश कडव, साम टीव्ही

बदलापूर : पुण्यात राजरोसपणे गोळीबाराच्या घटना वाढल्या आहेत. पुण्यातील गोळीबाराच्या घटनेचं लोण आता बदलापुरताही पसरलं आहे. बदलापुरात भाजप आमदार किसन कथोरे यांच्या बंगल्यासमोर गुरुवारी गोळीबार झाल्याची घटना घडली आहे. दिवसाढवळ्या घडलेल्या गोळीबाराच्या घटनेने परिसरात खळबळ उडाली आहे.

मिळालेल्या माहितीनुसार, बदलापुरात पुन्हा एकदा गोळीबाराची घटना घडली आहे. काही महिन्यांपूर्वी रेल्वे स्टेशनवर गोळीबाराची घटना घडली होती. त्यानंतर आता थेट भाजप आमदार किसन कथोरे यांच्या बंगल्यासमोरच गोळीबाराची घटना घडली आहे. दोन गटातील आपसातील वादातून गोळीबार झाला आहे. या गोळीबारात एक जण गंभीर जखमी झाला आहे.

बदलापुरात आमदार किसन कथोरे यांच्या बंगल्यासमोरील मुख्य रस्त्यावर गोळीबाराची घटना घडली. दोन गटातल्या वादातून हा गोळीबार झाल्याची प्राथमिक माहिती समोर येत आहे. या गोळीबारात अल्ताफ शेख हा जखमी झाला आहे. त्याला तातडीने उपचारासाठी खासगी रुग्णालयात दाखल करण्यात आलं.

अल्ताफ शेख याचीही गुन्हेगारी पार्श्वभूमी असल्याचे बोलले जात आहे. दोन गटातील वादातूनच हा गोळीबार झाल्याची प्राथमिक माहिती समोर येत आहे. बदलापूर गावात आमदारांचा निवासस्थान आहे. त्यांच्या घरासमोरूनच बोराटपाडा मुरबाडकडे रस्ता जातो. याच रस्त्यावर हा गोळीबार झाला आहे.

अल्पवयीन मुलाकडून दहिसरमध्ये गोळीबार

दरम्यान, काही दिवसांपूर्वी दहिसर परिसरात १२ वर्षांच्या मुलाने चुकून हवेत गोळीबार केल्याची घटना घडली होती. मुलाने केलेल्या गोळीबारात कोणतीही जीवितहानी झाली नाही. घटनेची माहिती मिळताच पोलिसांनी कसून चौकशी सुरु केली. १२ वर्षाच्या मुलाला ही बंदूक कचऱ्याच्या ढिगाऱ्यात सापडल्याची माहिती मिळत आहे. त्याने खेळण्यातील बंदूक त्याने हवेत गोळीबार केला.