मयुरेश कडव 
बदलापूर : रस्त्याने जाताना अनेक दुचाकीस्वार रिल्स तयार करण्यासाठी स्टंटबाजी करत असतात. करत काही जण विनाकारण वाकड्यातिकड्या पद्धतीने दुचाकी चालवत असतात. अशाच प्रकारे बदलापूरमध्ये स्टंटबाज बाईकस्वाराने स्टंटबाजी करण्याच्या नादात महिलेला आणि एका दुचाकीस्वाराला उडवल्याची घटना घडली. ही घटना सीसीटीव्हीतही कैद झाली आहे.

रिल्स करण्याच्या नादात दुचाकीस्वार कोणत्याही प्रकारचा विचार न करता रस्त्यावरून येणारी वाहने तसेच पादचाऱ्यांचा देखील विचार न करता दुचाकी चालवत असतात. अशा पद्धतीने रिल्स करणे अनेकांना महागात पडले आहे. दरम्यान काही जणांवर कारवाई देखील झाली आहे. अशाच प्रकारे बदलापूरमध्ये स्टंटबाजी करताना दुर्घटना घडल्याचे समोर आले आहे. मात्र या प्रकाराबाबत कोणत्याही प्रकारे गुन्हा दाखल झालेला नाही किंवा दुचाकीस्वारावर कारवाई झालेली नाही. 

महिला आणि दुचाकीला दिली धडक 
बदलापूर पश्चिमेच्या मांजर्लीतील मोहन ग्रीनवुड परिसरात ही घटना घडली आहे. २४ जून रोजी सायंकाळी सहा वाजेच्या सुमारास एका दुचाकीवर दोन जण स्टंटबाजी करत आले. या स्टंटबाजांनी आधी रस्त्यावरून जाणाऱ्या एका महिलेला उडवलं आणि मग एका दुचाकीला धडक देत स्वतः सुद्धा पाडले. यानंतर हा दुचाकीस्वार न थांबता घटनास्थळावरून पसार झाला होता. दरम्यान सदरची घटना सीसीटीव्ही कॅमेरात कैद झाली आहे. 

मुलींसमोर शायनिंग मारण्याच्या नादात 

दरम्यान या परिसरात असलेल्या ट्युशन क्लासच्या बाहेर उभ्या असलेल्या विद्यार्थिनींसमोर शायनिंग मारण्यासाठी दुचाकीस्वार स्टंटबाज याठिकाणी आले असावेत, असा अंदाज आहे. मात्र या घटनेला आता दोन दिवस उलटून देखील बदलापूर पश्चिम पोलिसांकडून कोणतीही कारवाई करण्यात आलेली नाही. यामुळे स्टंटबाजी करणाऱ्यांना चांगले फावत आहे.