Bachchu Kadu press conference political statement details : आमदारकीसाठी एकनाथ शिंदेंच्या शिवसेनेसोबत जाण्याइतका नालायक नाही, असे स्पष्ट करत बच्चू कडू यांनी आपली पुढील राजकीय भूमिका स्पष्ट केली. एकनाथ शिंदे यांनी बच्चू कडू यांना विधान परिषदेची आमदारकी आणि मंत्रिपद देण्याची ऑफर दिली होती, पण त्यासाठी प्रहार पक्ष शिवसेनेत विलीन करण्याची अट ठेवली होती. यावर बच्चू कडू यांनी आज आपली भूमिका स्पष्ट केली. "विधान परिषदेत एकनाथ शिंदेंचा पाईक म्हणून जाणार नाही," असेही यावेळी ते म्हणाले. पण शेतमजूर, दिव्यांगासाठी एकनाथ शिंदेंसोबत जाऊ शकतो, असे म्हणत कडू यांनी शिवसेनेसोबत जाणार असल्याचे संकेत दिले.

माजी मंत्री आणि प्रहारचे प्रमुख बच्चू कडू यांनी मुंबईत पत्रकार परिषद घेत आपली भूमिका स्पष्ट केली. "जनतेसाठी काम करणारा आमचा पक्ष आहे. मुद्दा असेल तरच युती करणारा माझा पक्ष आहे. सामंतांसोबत चर्चा झाली, पण कोणतीही स्पष्टता नाही. एकनाथ शिंदेंचा प्रस्ताव मला मीडियातून समजला. पत्रकार परिषदेनंतर एकनाथ शिंदेंचा निरोप आला तर त्यांना भेटेन. शिंदेंसोबत आमच्या सर्व मागण्या मांडणार आहे," असेही यावेळी बच्चू कडू म्हणाले.

"मी 'कडू' आहे, चेहरा आनंदी ठेवला नाही तर अजून कडू होईल," असा मिश्किल टोलाही यावेळी त्यांनी लगावला. "शिवसेना ही मातीतील संघटना आहे. मला कार्यकर्त्यांकडून १५ ते २० हजार मेसेज आले, मी विधान परिषदेवर जावे अशी लोकांची इच्छा आहे," असे बच्चू कडू म्हणाले. तसेच, यावेळी त्यांनी एकनाथ शिंदे आणि देवेंद्र फडणवीस यांचेही आभार मानले.

"राजकीय निर्णय सर्वसामान्यांना दिलासा देणारे असावेत. पुढे पाऊल टाकताना मोजून-मापून टाकावे लागेल. तुम्ही पेढे घेऊन या; सर्व निर्णय आताच सांगितले तर लोक राजनेता म्हणतील का?" असा सवाल यावेळी बच्चू कडू यांनी उपस्थित केला. "गौतम बुद्धांच्या भूमीत जाऊन आलो, संयम ठेवला. पण आता शेतकऱ्यांच्या आणि दिव्यांगांच्या मागण्यांवर संयम ठेवणार नाही. आमच्या अनेक मागण्या आहेत, त्या शिंदेंसमोर मांडणार आहे," असे बच्चू कडू म्हणाले.