माजी मंत्री बच्चू कडू यांचा प्रहार पक्ष शिंदेसेनेत विलीन होणार असल्याची चर्चा सध्या राजकीय वर्तुळात रंगलीय. शिंदेसेनेकडून बच्चू कडू यांना विधानपरिषदेची ऑफर देण्यात आल्याची माहिती आहे. मात्र कडू यांनी आपला पक्ष शिंदेसेनेत विलीन करावा, अशी अट उपमुख्यमंत्री एकनाथ शिंदे यांनी ठेवली असल्याचं सूत्रांनी सांगितलंय. त्यामुळे प्रहार पक्ष शिंदेसेनेत विलीन होणार का, याकडे सर्वांचे लक्ष लागलंय. दरम्यान, बच्चू कडू आज दुपारी 12 वाजता मुंबईत पत्रकार परिषद घेऊन आपली भूमिका स्पष्ट करणार आहेत.

बच्चू कडू विधान परिषदेवर जाणार?

विधान परिषदेच्या आमदारकीसाठी प्रहार पक्ष शिवसेनेत विलीन करावा, अशी मोठी अट एकनाथ शिंदे यांनी बच्चू कडू यांच्यासमोर ठेवल्याची चर्चा आहे. या पार्श्वभूमीवर बच्चू कडू आज दुपारी १२ वाजता मुंबईत पत्रकार परिषद घेऊन आपली भूमिका स्पष्ट करणार आहेत. मिळालेल्या माहितीनुसार, काल रात्री बच्चू कडू आणि एकनाथ शिंदे यांच्यात एक महत्त्वाची बैठक पार पडली. "प्रहार पक्ष विलीन न करता विधान परिषदेची जागा द्यावी," अशी अंतिम भूमिका बच्चू कडू यांनी या बैठकीत मांडल्याचे समजते. आता बच्चू कडू नेमका काय निर्णय घेतात, याकडे संपूर्ण राज्याचे लक्ष लागले आहे.