>> अमर घटारे

Bacchu Kadu : महापुरुषांबद्दलच्या वादग्रस्त वक्तव्यांवरून राज्यपाल आणि भाजप नेत्यांविरोधात महाविकास आघाडीकडून मुंबईत शनिवारी 17 डिसेंबरला महामोर्चा काढण्यात येणार आहे. सर्व महाराष्ट्र प्रेमींना या मोर्चाला पाठिंबा देण्याचं आवाहन महाविकास आघाडीच्या नेत्यांनी केलं आहे. या मोर्चाला आमदार बच्चू कडू (Bacchu Kadu) यांनी देखील अप्रत्यक्ष पाठिंबा दिला आहे.

महापुरुषांबद्दल जो कुणी जाणूनबुजून वाईट बोलत असेल तर त्याला रट्टा दिलाच पाहिजे, असं आमदार बच्चू कडू यांनी अमरावतीमध्ये म्हटलं आहे. महापुरुषांबद्दल वक्तव्य करणाऱ्या विरोधात मोर्चा काढला जात असेल तर ते चांगलंच आहे, असं देखील ते म्हणाले.  (Latest Marathi News)

शब्द चुकने आणि जाणून-बुजून बोलणं यात मोठा फरक आहे. तो कोणत्याही पार्टीचा असो,पदाचा असो त्याला रट्टा दिलाच पाहिजे. पण जाणून बुजून न बोलता जर त्याचं कोणी राजकारण करत असेल ते महापुरुषाबद्दल राजकारण करू नये अशी प्रतिक्रिया बच्चू कडू यांनी दिली.

राज्यपालांनी महापुषांबद्दल असं पुन्हा पुन्हा बोलू नये. तर कोणत्याही पक्षाच्या नेत्यानी सांभाळून महापुरुषाबद्दल बोलले पाहिजे. उद्याचा महाविकास आघाडीचा मोर्चा ऐतिहासिक आहे असं म्हणत बच्चू कडू यांनी महाविकास आघाडीच्या मोर्चाला समर्थनच दिलेल आहे.