गुजरातहून अंमली पदार्थ आणून विक्री करणाऱ्या जोडप्याला पोलिसांनी अटक केली आहे. यात सराईत गुंड असलेला अजय वाहूळ ऊर्फ ठाकूर आणि त्याची पत्नी राणी या दोघांचा समावेश आहे. छत्रपती संभाजीनगरातील त्यांच्या घरावर छापा टाकल्यानंतर ड्रग्जची पावडर, गांजा आणि नशेच्या गोळ्या असा १ लाखांपर्यंतचा मुद्देमाल पोलिसांनी जप्त केला आहे.

छत्रपती संभाजीनगरात एका जोडप्याच्या घरात अंमली पदार्थ आढळून आला आहे. या प्रकरणात अजय वाहूळ आणि त्याच्या पत्नीला पोलिसांनी कारवाई करत बेड्या ठोकल्या आहेत. छत्रपती संभाजीनगरातील सातारा परिसरातल्या साईनगरमध्ये त्यांच्या घरावर पोलिसांनी छापा टाकला होता. त्यांच्या घरामध्ये अंमली पदार्थ आढळून आले.

छापा टाकल्यानंतर घरात एमडी ड्रग्जची पावडर, गांजा आणि नशेच्या गोळ्या असा १ लाख ५ हजार ३८७ रुपयांचा मुद्देमाल पोलिसांनी हस्तगत केला आहे. गुजरातच्या सुरतहून आयेशा नावाच्या महिलेकडून अंमली पदार्थ आणून विक्री करीत असल्याची कबुली आरोपी ठाकूर याने पोलिसांना दिली आहे.

विशेष म्हणजे अजय ठाकूर हा कुख्यात गुंड आहे. तो सहा वर्षांपासून जेलमध्ये होता. त्यावेळी त्याची पत्नी राणी ठाकूर ही अंमली पदार्थांच्या विक्रीचा व्यवसाय सांभाळत होती. 'माझा नवरा डॉन आहे' असे धमकावत ती दादागिरी करून नशेचे अंमली पदार्थ विकत होती. या प्रकरणी पोलिसांनी तपास करून आरोपींना बेड्या ठोकल्या आहेत.