विश्वभुषण लिमये

सोलापूर : भारतीय जनता पक्षाचे विधानपरिषदेचे आमदार गोपीचंद पडळकर यांच्या वाहनावर अज्ञात इसमाने दगडफेक केल्याची घटना घडली आहे. सोलापुरातील मद्दे वस्ती परिसरात हा प्रकार घडला असून, सोलापूर शहर पोलीस घटनास्थळी दाखल झाले आहेत. Attck on Gopichand Padalkar's vehicle in Solapur

आपल्या आक्रमक शैलीने ओळखले जाणारे पडळकर सदैव विविध विषयांमुळे आणि वक्तव्यांमुळे चर्चेत असतात. महाविकास आघाडी सरकारवर टीका करण्याची एकही संधी गोपीचंद पडळकर सोडत नाहीत.

हे देखील पहा -

राष्ट्रवादी काँग्रेस पक्ष, शरद पवार आणि अजित पवार यांच्यावर प्रामुख्याने आपल्या वाग्बाणांनी पडळकर नेहमी हल्ला चढवत असतात. आज सकाळीच गोपीचंद पडळकर यांनी राष्ट्रवादीचे सर्वेसर्वा शरद पवार यांच्यावर केली होती. ''मी लहान असल्यापासून शरद पवार हे भावी प्रधानमंत्री आहेत, त्यांना भावी प्रधानमंत्रीपदासाठी शुभेच्छा. रात गेली हिशोबात पोरगं नाही नशिबात, त्यामुळं पुढं कुठल्यातरी लवणात ससा सापडेल अशी अपेक्षा,'' असं म्हणत गोपीचंद पडळकरांनी पवारांची खिल्ली उडवली होती.

त्यांच्या या वक्तव्यामुळे सोशल मीडिया आणि राजकीय पटलावर सकाळपासून भाजप आणि राष्ट्रवादीचे कार्यकर्ते आमनेसामने आल्याचे चित्र पाहावयास मिळत आहे. सोशल मीडियात देखील शरद पवार हे ज्येष्ठ नेते असून त्यांच्या वयाचा विचार करून टीका करावी अश्या प्रकारच्या संमिश्र प्रतिक्रिया उमटत आहेत.

दरम्यान सोलापूर दौऱ्यावर असणारे पडळकर सोलापूर जिल्ह्यात विविध ठिकाणी बैठका घेत आहेत. मद्दे वस्ती यथील बैठक झाल्यानंतर पडळकर पुढच्या प्रवासास निघाले असताना अज्ञातांनी त्यांच्या वाहनावर हल्ला केला आहे.

Edited By : Krushnarav Sathe