सत्ताधारी महायुती सरकारसाठी लाडकी बहीण योजना गेम चेंजर ठरण्याची शक्यता आहे. मध्य प्रदेशच्या निवडणुकीत सत्ताधारी भाजपला या योजनेनं तारलं होतं. महाराष्ट्रातही तसा फायदा होणार का? याची उत्सुकता आहे. राज्यात या योजनेला मोठा प्रतिसाद मिळालाय. पाहूया एक रिपोर्ट.

लोकसभा निवडणुकीत पिछेहाट झालेल्या सत्ताधारी महायुती सरकारसाठी लाडकी बहिण योजना गेम चेंजर ठरण्याची शक्यता आहे. कारण राज्यात या योजनेला मोठा प्रतिसाद मिळालाय. या योजनेवरुन महायुतीत श्रेयवादही दिसून आला. शिंदे गट आणि राष्ट्रवादीच्या नेत्यांनी या योजनेवरुन कुरघोडी केल्या. योजनेवरुन राजकारण झालं असलं तरी मध्यप्रदेश प्रमाणे महाराष्ट्रातही या योजनेमुळे सत्ताधाऱ्यांची मतांची झोळी भरणार असा अंदाज आहे.

गरजू महिलांना आर्थिक सहाय्य म्हणून सरकारकडून दरमहा 1500 रुपये दिले जात आहेत. 17 ऑगस्टला रक्षाबंधनाला योजनेचा शुभारंभ झाला. नोव्हेंबरचे पैसेही ऍडव्हान्समध्ये जमा झाले आहेत.

योजनेसाठी अर्ज भरण्याची मुदतही आचारसंहिता लागण्यापूर्वी 15 ऑक्टोबरपर्यंत वाढवण्यात आली होती.

मुख्यमंत्री माझी लाडकी बहीण योजनेचा सुमारे 2 कोटी महिलांना लाभ झाल्याचा दावा सरकारनं केलाय.

योजनेला प्रतिसाद मिळाल्यावर मुख्यमंत्र्यांनी भविष्यात लाडक्या बहिणींना मदत वाढवली जाईल, असं आश्वासन दिलंय. दुसरीकडे ही योजना दोन महिन्यांत बंद होणार असल्याचा दावा राज ठाकरेंनी केलाय. महिलांच्या हातांना काम द्या. त्यांना सक्षम बनवा, अशी सूचना त्यांनी केली आहे.

एकीकडे या योजनेमुळे मतं मिळतील या आशेने सत्ताधारी सुखावले असले तरी या योजनेवरुन विरोधकांनी सरकारला घेरलंय. तिजोरीत खडखडाट असताना केवळ मतांसाठी योजना आणल्याचा हल्लाबोल मविआच्या नेत्यांनी केलाय. विशेष म्हणजे केंद्रीय मंत्री नितीन गडकरींनी महायुती सरकारला घरचा आहेर दिला होता.

या योजनेमुळे इतर विभागांमधल्या अनुदानाला कात्री लागल्याचं विधानही त्यांनी केलं होतं,. राज्याची आर्थिक स्थिती बिकट असताना तब्बल 46 हजार कोटींची योजना राबवणार कशी अशी चिंता राज्याच्या वित्त विभागानं सतावते आहे. अशी स्थिती असली तरी पैसे जमा झाल्यानं लाडक्या बहिणी खूश आहेत. त्यामुळे महायुतीसाठी लाडकी बहीण योजना गेम चेंजर ठरणार का हे विधानसभा निकालानंतरच स्पष्ट होणरा आहे.