मयुर राणे, मुंबई

Sanjay Raut On BJP: "राज्यातील मतदार भारतीय जनता पक्षाच्या विरोधात आहे. भाजप बुडत आहे, ते पराभवाच्या खाईत आहे. त्यामुळे विधानसभा निवडणुका जिंकता याव्यात म्हणून भारतीय जनता पक्ष मतदार याद्यांमध्ये घोटाळे करत आहे, असा घणाघाती आरोप शिवसेना ठाकरे गटाचे खासदार संजय राऊत यांनी केला. या संदर्भात महाविकास आघाडीच्या बैठकीमध्ये चर्चा झाली असल्याचेही त्यांनी सांगितले. मुंबईमध्ये ते माध्यमांशी बोलत होते.

काय म्हणाले संजय राऊत?

"आमची बैठक सुरू असताना एका महत्त्वाच्या विषयावर चर्चा झाली. भारतीय जनता पक्षाविरोधात जनमत असल्यामुळे निवडणूक आयोगाला हाताशी धरून भारतीय जनता पक्ष मतदार यादीत घोटाळे करायला लागले आहे. भारतीय जनता पक्ष ज्या भागात लढणार आहे त्या भागात हे घोटाळे होणार आहेत. शिंदे गट, अजित पवार गटाला यामधून बाजूला ठेवले आहे. भारतीय जनता पक्ष ज्या भागात लढणार आहे, जे पक्के मतदारसंघ आहेत. त्यामध्ये दहा हजार नावे मतदार संघातून काढायचे आणि दहा हजार बोगस नाव टाकायचे," असा प्लॅन असल्याचे संजय राऊत यांनी सांगितले.

"बीजेपीतले चार प्रमुख नेते या घोटाळ्याचे प्रमुख आहेत. त्यातील एक राज्यपाल नियुक्त आमदार आहे तो या सर्वांचा सूत्रधार आहे. चंद्रशेखर बावनकुळेही यामागचे प्रमुख सुत्रधार आहेत, त्यांनी याबाबत नागपूरमध्ये ट्रेनिंग शिबिरही घेतले, असा दावाही संजय राऊत यांनी केला. तुम्हाला अशा प्रकारे निवडणुका जिंकता येणार नाही तुम्ही मर्द असाल तर लोकशाही मार्गाने आमच्यासमोर उभे रहा आणि निवडणुका जिंकून दाखवा हरियाणाला आणि झारखंडला तेच केलं आणि आता महाराष्ट्रात सुद्धा तेच करणार..." असा टोलाही राऊतांनी लगावला.

दरम्यान, महाविकास आघाडीच्या जागा वाटपासंदर्भात काल साधारण दहा तास बैठक झाली. त्यानंतर आज आम्ही साडेबारा वाजता हा मातोश्रीवर शिवसेना नेत्यांची तातडीची बैठक बोलावली आहे. आम्हाला काही निर्णय घ्यावे लागतील, नेत्यांची चर्चा करावी लागेल. आम्ही सगळे मातोश्रीला जाणार आहोत.. असेही संजय राऊत म्हणाले.