औरंगाबाद - समलिंगी मैत्रिणींमध्ये ब्रेकअपनंतरचा वाद इतका विकोपाला गेला की दोघींनाही थेट पोलीस ठाण्यात जावं लागलं. ही घटना औरंगाबाद शहरात घडली आहे. औरंगाबाद (Aurangabad) शहरातील क्रांती चौक पोलिसांनी (Police) दोघींनाही समजावून सांगून प्रकरण मिटवले, शिवाय यापुढे एकमेकांना त्रास होणार नाही, असं वर्तन करणार नसल्याचे लिहूनही घेण्यात आलं आहे. काही वर्षांपूर्वी औरंगाबादमधील दोन समलिंगी मैत्रिणींमध्ये प्रेम बहरले. आनंदाने नाते फुलतही गेले. मात्र, काही काळानंतर एकीला हे नाते नकोसे झाल्यानं ती दूर गेली. त्यामुळे दुसरीला ते सहन झाले नाही. दोघींमधील वाद एवढे वाढले की दुसरीने नाते कायम राखण्यासाठी आत्महत्येची, दोघींची विशिष्ट छायाचित्रे व्हायरल करण्याची धमकी दिली.

हे देखील पहा -

त्यानंतर त्या दोघींचा वाद औरंगाबाद शहरातील क्रांती चौक पोलीस ठाण्यात पोहाेचला. पोलिसांनी दोघींना समजावून सांगितले. २१ वर्षीय दोघीजणी एकाच वसाहतीत राहतात. काॅलेजमध्ये शिक्षण सुरू झाल्यानंतर त्यांच्यातील ओळख वाढली. हळूहळू ओळखीचे रूपांतर मैत्रीत झाले. नंतर रोज भेटू लागल्या. पुढे मैत्रीचे रूपांतर प्रेमाच्या नात्यात झाले. मात्र, अलीकडे दोघांचे भांडण विकोपाला गेले.

क्रांती पोलीस ठाण्यात सहसा खून, हाणामारी, मोठ्या चोऱ्या किंवा फसवणुकीच्या तक्रारी येतात. त्यामुळे उच्च वर्गातील दोन तरुणींचे प्रेमप्रकरण आणि त्यातून गुन्हा घडण्याची दाट शक्यता असे प्रकरण समोर येताच पोलीस अधिकारी काही काळ थोडेसे चक्रावले होते. थेट कारवाईऐवजी पाेलिसांनी आधी समजावून सांगितले. शिवाय लिहून घेतले, मग दोघींनी मान्य करून आपला रस्ता धरला.