अमर घटारे 

अमरावती : अमरावती शहरात अवैधपणे सुरु असलेल्या हुक्का पार्लरवर शहर गुन्हे शाखा युनिट २ च्या पथकाने धाड टाकत कारवाई केली आहे. या कारवाईत पोलिसांनी २ लाख ८७ हजार ४७५ रुपयांचा मुद्देमाल हस्तगत केला आहे. यामध्ये एमडी ड्रग्स देखील आढळून आले आहेत. यात काही जणांना पोलिसांनी ताब्यात घेतले आहे. 

अमरावती शहरातील रायली प्लॉट येथे अवैध हुक्का पार्लर सुरु होता. यानंतर पोलिसांना मिळालेल्या गुप्त माहितीनुसार प्रमेन्द्र ओमप्रकाश शर्मा (वय ५५) याने आपल्या घराच्या टेरेसवर काफिला नावाचा हुक्का पार्लर चालवत असल्याचे समोर आले. तेथे विदेशी दारू विक्री व अंमली पदार्थांचे सेवनही होत असल्याची खात्री पटल्यावर पथकाने धाड टाकत कारवाई केली आहे.  

पोलिसांशी घातली हुज्जत 

पोलिसांनी हुक्का पार्लरवर वर धाड टाकत याठिकाणाहून २ लाख ८७ हजार ४७५ रुपयांचा मुद्देमाल जप्त केला आहे. यात एम.डी. (मॅफेडॉन) अंमली पदार्थ, गांजा, विदेशी दारू, हुक्का सेवन साहित्य आणि मोबाईल यांचा समावेश आहे. यावेळी पथकाला प्रतिकार करत आरोपींनी हुज्जतबाजी, झटापट केली आणि काही ग्राहकांना पळवून लावण्याचा प्रयत्न केला. पोलिस आयुक्त अरविंद चावरीया यांच्या आदेशानुसार पीआय संदीप चव्हाण यांच्या  पथकाने ही कारवाई केली आहे.  

११ जणांना घेतले ताब्यात 

दरम्यान पोलिसांच्या पथकाने कारवाई पूर्ण करत याठिकाणाहून एकूण ११ आरोपींना ताब्यात घेतले आहेत. तसेच त्यांच्याकडून २५ ग्रॅम गांजा, ३ ग्रॅम एम.डी., विविध हुक्का साहित्य, नगदी व विदेशी दारू जप्त करण्यात आली. या प्रकरणी अधिक चौकशी सुरु असून पोलिसांच्या या कारवाईमुळे अवैध धंदे चालविणाऱ्यांचे धाबे दणाणले आहे.