अमर घटारे 
अमरावती : बंजारा समाजाला एसटी संवर्गातून आरक्षण मिळावे; यासाठी बंजारा समाज आक्रमक झाला आहे. राज्यभरात आंदोलन सुरु करण्यात आले असून आज अमरावतीत सकल बंजारा समाजाच्या वतीने एसटी संवर्गाच्या आरक्षणाच्या मागणीसाठी भव्य मोर्चा काढण्यात आला. जिल्हाधिकारी कार्यालयावर काढण्यात आलेल्या या मोर्चामध्ये हजारोच्या संख्येने बंजारा बांधवांनी उत्स्फूर्त सहभाग नोंदवला.

राज्यात मराठा समाजाला हैद्राबाद गॅझेटनुसार आरक्षण देण्याचा निर्णय राज्य सरकारने घेतला आहे. तसा जीआर काढण्यात आला आहे. मराठा समाजाला आरक्षण मिळाल्यानंतर ओबीसी समाज व बंजारा समाजाने आक्रमक भूमिका घेतली आहे. प्रामुख्याने बंजारा समाजाने एसटी संवर्गातून आरक्षण मिळावे यासाठी राज्यभरात आंदोलन सुरु केले आहे. त्यानुसार अमरावतीमध्ये मोर्चा काढण्यात आला. 

तीव्र आंदोलनाचा दिला इशारा 
"एकच मिशन – एसटी आरक्षण" अशा जोशपूर्ण घोषणा देत समाजबांधवांनी आपली ताकद दाखवली. मोर्चात महिला व युवकांचा देखील मोठ्या प्रमाणात सहभाग दिसून आला. हैदराबाद गॅझेट इतर जातींना जसं जाहीर केलं तसं बंजारा समाजाला सुद्धा जाहीर करा व आदिवासींचे आरक्षण आम्हाला मिळावे; अशी मागणी यावेळी बंजारा समाजाने केली. यावेळी नेत्यांनी समाजातील नेत्यांनी जिल्हाधिकाऱ्यांना निवेदन देऊन एसटी आरक्षण तात्काळ लागू करण्याची मागणी केली. अन्यथा आंदोलन आणखी तीव्र करण्याचा इशारा दिला.

सोलापुरातही भव्य मोर्चा 

बंजारा समाजाला आरक्षण मिळावे यासाठी बंजारा समाज आक्रमक झाला असून सोलापुरात देखील मोर्चा काढण्यात आला. सोलापुरातील वसंतराव नाईक यांच्या पुतळ्यापासून निघालेला मोर्चा सोलापूर जिल्हाधिकारी कार्यालयाला जाऊन धडकणार आहे. या मोर्चामध्ये हजारोंच्या संख्येने पारंपारिक वेशभूषा धारण करून महिला वर्ग त्यासोबतच तरुणांचा समावेश आहे.