अमर घटारे 
अमरावती : अमरावती जिल्ह्यातील अपंगांना कर्ज मंजूर करण्यासाठी उद्धट वागणूक देणाऱ्या आणि दिशाभूल करणारे बँक मॅनेजरवर त्वरीत कार्यवाही करावी. तसेच कर्ज मंजूर करण्यात यावे; यासाठी आज अमरावती जिल्हाधिकारी कार्यालय येथे सामुहिक आत्मदहन आंदोलन करण्याचा प्रयत्न करण्यात आला. यावेळी पोलीसांनी सर्वांना ताब्यात घेतले. 

अमरावती (Amravati) जिल्ह्यातील अनेक अपंगांना स्वयंरोजगारासाठी राज्य शासनाच्या अपंग बिज भांडवल योजना (कर्ज योजना) अंतर्गत जिल्हा परिषद समाज कल्याण विभागात कर्जाचे प्रस्ताव सादर केले होते. हे प्रस्ताव संपूर्ण तपासणी करुन संबंधित बँकांना (Bank) मंजुरीसाठी पाठविण्यात आले. परंतु बँक मॅनेजरने अपंग आहे; म्हणून कर्ज प्रस्ताव मंजुरीस नकार दिला आणि उद्धट वागणूक दिली. सोबतच दिशाभुल केली असल्याचा आरोप करण्यात आला आहे. 

दरम्यान अशा प्रकारे अपमानास्पद वागणूक देणाऱ्या बँक मॅनेजरवर कारवाई करून कर्जाचे प्रकरण मंजूर करण्यात यावे; यासाठी आत्मदहन आंदोलन करण्याचा इशारा देण्यात आला होता. हे आंदोलन करण्यासाठी जिल्हाधिकारी कार्यालयासमोर जमल्यानंतर पोलिसांनी सर्वाना ताब्यात घेतले आहे. यात दोन जण सापडले नसून त्यांचा शोध पोलीस घेत आहे.