अमर घटारे, साम टीव्ही

रायगडमध्ये ताम्हिणी घाटातील अपघाताची घटना ताजी असताना अमरावतीतही भीषण अपघात झाला आहे. अमरावती शहरात भरधाव कारने चौघांना उडवल्याची घटना समोर आली आहे. अमरावतीच्या मोतीनगरमध्ये हा अपघात घडला. या अपघातानंतर संपप्त लोकांनी कारची तोडफोड केली. कार चालवणाऱ्या तरुणीलाही लोकांनी चोपलं.

मिळालेल्या माहितीनुसार, अमरावती शहरातील मोतीनगर चौकात सकाळी सुसाट वेगाने येणाऱ्या कारने चार लोकांना जोरदार धडक दिली. कार सुसाट वेगाने येत असताना मोतीनगर चौकात अचानक एकच खळबळ उडाली. तरुणीचे कारवरील नियंत्रण सुटून कारने रस्त्याने जाणाऱ्या दुचाकीस्वार आणि हातगाडी चालकाला धडक दिली.न

भरधाव कार समोर येत असल्याचे पाहताच अनेक जण जीव मुठीत घेऊन रस्त्याच्या कडेला पळाले. या अपघातानंतर संतप्त जमावाने दगड आणि लाथा बुक्क्याच्या साहाय्याने कारचे दरवाजे आणि कार फोडून टाकली. या अपघातात दोन दुचाकींचं नुकसान झालं आहे, तर कार चालक तरुणीला काही महिलांनी मारहाण केली. या अपघातात चार जण जखमी झाले आहेत. या अपघात प्रकरणी फ्रेजरपुरा पोलिसांनी तत्काळ धाव घेऊन चारचाकी वाहनासह त्या चालक तरुणीला ताब्यात घेतले.

रायगडमध्ये कार नदीत कोसळली

रायगड ताम्हिणी अपघात झाला आहे. ही कार १२०० फूट दरीत कोसळली. या अपघातात सहा जणांचा जागीच मृत्यू झाला आहे. सर्व मृत तरुण पुण्यातील रहिवाशी असल्याची माहिती मिळत आहे. सर्व तरुण फिरण्यासाठी घराबाहेर पडले होते, अशी प्राथमिक माहिती हाती आली आहे. त्यातील काही जण बेपत्ता होते. त्यांचा मृतदेह दरीतून बाहेर काढण्याचे प्रयत्न सुरु आहेत.