अमर घटारे, साम टीव्ही

अमरावतीमधून एक खळबजनक घटना समोर आली आहे. अमरावतीच्या वलगाव पोलीस स्टेशच्या हद्दीतील खारतळेगावात बायकोने नवऱ्याची हत्या केली. पत्नीने केलेल्या जबर मारहाणीत पतीचा मृ्त्यू झालाय. ४५ वर्षीय पतीच्या मृत्यूने गावात एकच खळबळ उडाली. या प्रकरणी पोलिसांनी कारवाईला सुरुवात केली आहे.

मंगेश देविदास गोटे असे हत्या झालेल्या व्यक्तीचे नाव आहे. मंगेश हा कुटुंबासोबत खारतळेगावात राहत होता. मंगेश गोटे हा घरात सारखा दारू पिऊन यायचा. नवरा मंगेशच्या सततच्या दारू पिण्याला बायको वैतागली होती. नवरा दारू पिऊन त्रास द्यायचा, अशी बायकोची तक्रार होती.

त्या दिवशी काय घडलं?

मंगेश दारू पिऊन आला होता. दारूच्या नशेत असलेल्या मंगेशने बायकोला त्रास द्यायला सुरुवात केली. त्यानंतर भडकलेल्या बायकोने नवऱ्याला लाथाबुक्क्यांनी मारहाण केली. या मारहाणीत पतीचा मृत्यू झाला. पतीच्या मृत्यूनंतर शेजारीपाजारी लोकांमध्ये खळबळ दिली. त्यावेळी बायकोने नवऱ्याला माराहाण केल्याचे कबूल केले. या घटनेची माहिती मिळताच पोलिसांनी घटनास्थळी धाव घेतली.

पोलिसांनी घटनास्थळी पोहोचून मंगेशच्या बायकोला ताब्यात घेतलं. तसेच घरात असलेला मृतदेह ताब्यात घेतला. त्यानंतर मंगेशचा मृतदेह शवविच्छेदनासाठी रुग्णालयात पाठवला. शवविच्छेदनात मारहाणीमुळे मंगेशचा मृत्यू झाल्याचे निष्पन्न झाले. या प्रकरणी वलगाव पोलिसांकडून अधिकचा तपास सुरू केली आहे.

अमरावतीचे पोलीस आयुक्त गणेश शिंदे यांनी सांगितलं की, 'मंगेश गोटे याची त्याच्या पत्नीने हत्या केली. नेहमी दारू पितो आणि त्रास देत मारहाण करतो, या कारणावरून लाथबुक्यांनी मारहाण करत हत्या केली. या प्रकरणी वलगाव पोलिसांनी गुन्हा दाखल केला आहे. तसेच या प्रकरणाचा पुढील तपास देखील सुरू केला आहे.