अंबरनाथ : अंबरनाथ पालिकेच्या स्वच्छता निरीक्षकाला एक लाख रुपयांची लाच (Bribe) घेताना रंगेहाथ अटक (Ambarnath) करण्यात आली. विलास भोपी असे या स्वच्छता निरीक्षकाचे नाव असून ठेकेदाराचे बिल काढण्यासाठी त्याने ३ लाख ७० हजार रुपयांची लाच मागितली होती. (Tajya Batmya)

अंबरनाथ पालिकेत कुगन कन्स्ट्रक्शन नामक ठेकेदार काम करतो. या ठेकेदाराचे बिल काढण्यासाठी स्वच्छता निरीक्षक विलास भोपी यांनी ३ लाख ७० हजार रुपयांची लाच मागितली होती. तसेच यापैकी अर्धा ॲडव्हान्स म्हणून १ लाख ८५ हजार रुपये देण्यासाठी त्याने ठेकेदाराकडे तगादा लावला होता. त्यामुळे ठेकेदाराने (ACB) लाचलुचपत प्रतिबंधक विभागाकडे याची तक्रार केली.

लाचलुचपत विभागाने अंबरनाथमध्ये सापळा रचत विलास भोपी याला ठेकेदाराकडून १ लाख रुपये घेताना रंगेहाथ अटक केली. याप्रकरणी त्याच्याविरोधात अंबरनाथ पोलीस ठाण्यात गुन्हा दाखल करण्यात आला असून त्याला लाचलुचपत प्रतिबंधक विभागाच्या कोठडीत ठेवण्यात आलं आहे.