राजेश भोस्तेकर

अलिबाग : सोसायटी नोंदणी प्रमाणपत्र पडताळणी प्रकरणी 27 सप्टेंबर रोजी अलिबाग लाचलुचपत पथकाने पकडलेल्या सहकार संस्था विभागाचे जिल्हा उपनिबंधक गोपाळ माळवे आणि मुख्य लिपिक सुहास दवटे यांना आज अलिबाग जिल्हा न्यायाधीश दुसरे आणि अतिरिक्त सत्र न्यायाधीश थत्ते यांच्या न्यायालयात हजर करण्यात आले. न्यायालयाने दोघांनाही, 30 सप्टेंबर पर्यंत दोन दिवसांची पोलीस कोठडी सुनावली आहे.

हे देखील पहा :

सहकार संस्थेच्या कार्यालयातील जिल्हा उपनिबंधक गोपाळ माळवे आणि मुख्य लिपिक सुहास दवटे यांनी रोहा अष्टमी येथील एका सोसायटी नोंदणी प्रकरणाची पडताळणी करून प्रमाणपत्र देण्यासाठी 40 हजाराची लाच मागितली होती. तक्रारदार यांनी याबाबत अलिबाग लाच लुचपत विभागाकडे तक्रार दाखल केली होती. त्यानुसार पथकाने सापळा रचून 27 सप्टेंबर रोजी माळवे आणि दवटे यांना लाच स्वीकारताना अटक केली. आज 28 सप्टेंबर रोजी माळवे आणि दवटे या दोघांना लाच लुचपत विभागाने अलिबाग जिल्हा न्यायालयात हजर केले.

सरकार पक्षातर्फे सरकारी वकील ऍड.भूषण साळवी यांनी माळवे याचे नाशिक येथील एका बँकेत लॉकर आहे. तसेच इतर कार्यालयातील प्रकरणात आर्थिक देवाणघेवाण प्रकार झाले आहेत का असा युक्तिवाद करून दोन दिवसांची पोलीस कोठडी देण्याची विनंती न्यायालयाकडे केली होती. आरोपी पक्षातर्फे ऍड.प्रवीण ठाकूर यांनी युक्तिवाद केला. दोन्ही पक्षाचे युक्तिवाद ऐकल्यानंतर न्यायाधीश थत्ते यांनी माळवे आणि दवटे यांना दोन दिवसांची पोलीस कोठडी सुनावली आहे. त्यामुळे पुढील तपास लाच लुचपत विभागाकडून सुरू आहे.

Edited By : Krushnarav Sathe