अकोला : राज्यात गुन्हेगारीचं सत्र काही थांबता थांबत नाहीय. बीड, अहमदनगर, पुणे या शहरांमध्ये गुन्हेगारीने अक्षरश: धुमाकूळ घातलाय. याचदरम्यान, अकोल्यात देखील एक संतापजनक घटना समोर आली आहे. ऐन रस्त्यावर एका व्यावसायिकाला दोन गवा गुंडांनी क्रूरपणे मारहाण केली असल्याचं समोर आलं आहे. अकोल्यातल्या मोठी उमरी ते टावर चौक रस्त्यावरील रतनलाल प्लॉट चौकात ही घटना घडली आहे. या घटनेचा व्हिडिओ देखील समोर आला.

मारहाण होत असताना रस्त्यावर बघणाऱ्यांची प्रचंड गर्दी होती. मात्र, गर्दीतील कुणीही व्यावसायिकाला वाचवण्यासाठी समोर आलं नाही. इराणी झोपडपट्टीतील दोनपैकी एक आरोपीला अटक करण्यात आली आहे. काल रात्री ९ वाजेच्या सुमारास ही घटना घडली आहे. शहरातील प्रचंड वर्दळीच्या असलेल्या रतनलाल प्लॉट चौकात हा प्रकार समोर आला आहे. मारहाण करताना व्हिडिओमध्ये 'सर पे क्यू मारा..? सर पे क्यू मारा?' असं बोलल्याचं ऐकू येतंय. या घटनेनंतर अकोल्यात पोलिसांच्या कार्यक्षमतेवर प्रश्नचिन्ह उपस्थित झालं आहे.