अकोला : 'एनसीबी'च्या तोतया अधिकाऱ्याला अटक करण्यात आली आहे. अकोला जिल्ह्यातील दहिहांडा पोलिसांनी (Police) ही कारवाई केली आहे. नदीम शाह दिवाण असं या भामट्याचे नाव असून तो अकोला (Akola) जिल्ह्यातील चोहोट्टाबाजारचा मूळ रहिवासी आहे. नदीमसोबत त्याच्या तीन साथीदारांनाही पोलिसांनी ताब्यात घेतलं आहे. (Live Marathi News)

मिळालेल्या माहितीनुसार नागपूर शाखा एनसीबीचा अधिकारी असल्याचे सांगत नदीम शाह दिवाण याने अकोला जिल्ह्यातील चौहट्टा बाजार परिसरात पान टपऱ्यांवर कारवाई केली. दरम्यान मागील एक महिन्यापासून दहीहंडा पोलीस स्टेशन हद्दीत हे एनसीबीचे तोतया अधिकारी फिरत असल्याची माहिती पोलिसांना मिळाली. त्‍यानुसार शोध सुरू केला होता.

वाहनावर भारत सरकारचे स्‍टीकर

माहितीच्या आधारे पोलिसांनी चोहट्टा बाजार परिसरात तोतया अधिकारी असलेल्‍या इसमांचा शोध घेतला. तेव्हा हे चारही तोतया अधिकारी आढळून आले असून त्यांच्याकडे एक चारचाकी वाहन, त्यावर पिवळ्या कलरचा दिवा लावलेला होता. तसेच या वाहनावर भारत सरकार असल्याचे स्टिकर होते.