अकोला - बार्शीटाकळी तालुक्यातल्या जमकेश्वर येथे जीर्ण झालेल्या प्रवाशी निवाऱ्याची छत अंगावर पडून एका युवकाचा दुर्दैवी मृत्यू झाल्याची घटना घडली आहे. विकी कोकरे असं या मृतक युवकाचे नाव आहे. अकोला (Akola) जिल्ह्यातील ग्रामीण भागात प्रवाशांच्या सोयीसाठी बांधलेले प्रवाशी निवारे शेवटच्या घटका मोजत असून या जीर्ण झालेल्या प्रवाशी निवाऱ्यांकडे लोकप्रतिनिधी सह प्रशासनाच्या कोणाचेही लक्ष नसल्याचे या घटनेवरून स्पष्ट होत आहे.

कारण याच जीर्ण प्रवाशी निवाऱ्यामुळे एका बावीस वर्षीय युवकाला आपला जीव गमवावा लागला आहे. बार्शीटाकळी तालुक्यातील जमकेश्वर येथील प्रवासी निवा-यात येथीलच विकी वसंत कोकरे वय अंदाजे (22) वर्ष हा मोबाईल बोलत असताना अचानकपणे पुर्ण स्लॅब कोसळला आणि तो त्याखाली दबला यातच या युवकाचा दुर्दैवी मृत्यू झाला.

हे देखील पाहा -

दरम्यान याची माहीती पिंजर मानवसेवा आपत्ती व्यवस्थापन फाऊंडेशनच्या संत गाडगेबाबा आपत्कालीन शोध व बचाव पथकाचे प्रमुख दीपक सदाफळे यांना माहिती देऊन तात्काळ रेस्क्यु ऑपरेशनसाठी पाचारण केले दरम्यान पथकाने युवकाचा मृतदेह मलब्याखालून बाहेर काढला आहे.

जिल्ह्यातील प्रवाशी निवारे मोजत आहेत शेवटच्या घटका-

जिल्ह्यातील ग्रामीण भागात अनेक ठिकाणी स्थानिक आमदार यांच्या निधीतून प्रवाशी निवाऱ्यांचे बांधकाम करण्यात आले आहे. मात्र गेल्या अनेक वर्षांपासून बांधकाम करण्यात आलेले प्रवाशी निवारे हे आता शेवटच्या घटका मोजत आहेत. त्यामुळे हे प्रवाशी निवारे तितकेच धोकादायक बनले आहेत. या निवाऱ्यांकडे ना कुन्या लोकप्रतिनिधीचे लक्ष आहे ना प्रशासनाचे त्यामुळे या प्रवाशी निवाऱ्याखाली आसरा घेताना जरा सावधच रहा.