अकोला : गोरगरिबांना शासनाच्या सार्वजनिक धान्य वितरण प्रणाली मार्फत देण्यात येणारा ६०० क्विंटल गहू खामगाव येथून हैदराबाद येथे काळ्या बाजारात विक्रीसाठी नेत असताना पोलिसांनी जप्त केला आहे. एवढ्या मोठ्या प्रमाणात सरकारी रेशनचा गहू पकडल्याने रेशन माफियांमध्ये खळबळ उडाली आहे. याबाबत पोलीस सूत्रांकडून मिळालेल्या माहितीनुसार, विशेष पथकाला खबऱ्या मार्फत गोपनीय माहिती मिळाली की, खामगाव येथून शासकीय रेशनचा गहू काळ्याबाजारात विक्रीसाठी जात आहे.

हे देखील पहा :

प्राप्त माहिती वरून पोलीस निरीक्षक पाटील आणि त्यांच्या चमूतील कर्मचारी यांनी, बाळापूर पोलीस ठाण्याच्या हद्दीत येत असलेल्या, राष्ट्रीय महामार्गावरील साई ढाबा येथे नाकाबंदी करून, खामगावच्या दिशेने येणाऱ्या AP-20,TB-4699 क्रमांक असलेल्या ट्रकला थांबवून, झडती घेतली असता,सदर ट्रक मध्ये सरकारी रेशनच्या गव्हाची ६०० पोते त्याचे वजन ३० टन आहे. सदर गहू कोणाचा आहे, कुठे नेण्यात येत आहे, याबाबत ट्रक चालकाला विचारपूस केली असता, सुरवातीला त्याने उडवाउडवीची उत्तरे दिली. परंतु, पोलिसांनी त्याची कसून चौकशी केल्यावर, हा गहू शासकीय रेशनचा असून, तो गहू तेलंगणा राज्यात हैदराबाद येथे विक्रीसाठी जात असल्याचे त्याने सांगितले.

यावरून ट्रक चालक शेख जावेद ख्वाजा वय २८ वर्षे, रा.भंगारी पुरा, आदीलाबाद तेलंगणा राज्य, याला अटक करून, त्याच्याकडून ६ लाख रुपयांचा ३० टन गहू, २० लाख रुपये किंमतीचा ट्रक असा एकूण २६ लाख रुपयांचा मुद्देमाल जप्त करण्यात आला आहे. ट्रक चालकाविरोधात बाळापूर पोलीस ठाण्यात, भारतीय जीवनावश्यक अधिनियम च्या कलम 3,7 कलमान्वये गुन्हा नोंद करण्यात आलेला आहे. काळ्या बाजारात विक्रीसाठी जाणाऱ्या या रेशनचा मालक कोण आहे, याचा शोध पोलीस घेत आहेत. ही कारवाई जिल्हा पोलिस अधीक्षक जी.श्रीधर यांच्या विशेष पथकाने केली आहे.

Edited By : Krushnarav Sathe